Будилникот ѕвони, надвор е уште темно, а креветот никогаш не бил потопол. Ако ви се чини дека во ноември станувате многу потешко отколку во јуни, не ви се чини. Не сте мрзливи. Телото ви реагира на недостигот од светлина.
Внатрешниот часовник се води по светлината
Мозокот ни има внатрешен часовник што го регулира сонот и будењето. Главниот сигнал што го користи е дневната светлина. Кога наутро е темно, телото продолжува да лачи мелатонин, хормонот на сонот, иако будилникот веќе ѕвонел.
Резултатот: станувате, но телото уште мисли дека е ноќ. Отука тромоста, лошото расположение и третото кафе.
Зошто е полошо по промената на времето
По враќањето на зимското сметање на времето, вечерите се темни порано, а многумина поминуваат цел ден на работа под вештачко осветлување. Мозокот добива премалку силна светлина во текот на денот и ритамот се „размачкува“.
Седум трика за полесно будење
- веднаш отворете ги завесите или запалете силна светлина
- ако можете, излезете надвор 10–15 минути преку ден, дури и кога е облачно
- не го одложувајте будилникот – секое „уште пет минути“ го прекинува сонот и ве прави поуморни
- станувајте во исто време, и за викенд
- оставете го телефонот подалеку од креветот
- лесна вежба или туширање наутро го буди телото
- вечер пригушете ги светлата и легнете порано
Кога да се загрижите
Ако умороста трае со недели, ако ништо не ве радува и ако ви се менува апетитот, тоа може да биде сезонска депресија, која е честа во зимските месеци. Тогаш вреди да разговарате со лекар.
Во меѓувреме, бидете малку понежни кон себе. Не сте единствените на кои ноември им е тежок.
