Ако сакате со само еден детаљ да му дадете на домот помодерен и пософистициран изглед, оваа година вниманието е насочено кон заоблените форми.
Од заоблени софи и фотелји до овални маси и огледала со неправилни рамки – меките линии се сè почест избор во современите ентериери. Дизајнерите забележуваат зголемен интерес за органски и скулптурални форми кои просторот го прават визуелно помек и попријатен.
Доволно е еден елемент
Не мора целата соба да ја преуредите. Една заоблена фотелја, мала овална масичка или огледало со органска форма може да биде доволно за просторот да добие поинаков изглед.
Особено популарни се заоблените софи, кои создаваат попријатна атмосфера и поттикнуваат луѓето да седат еден кон друг и полесно да разговараат.
Зошто сите ги сакаат?
По години во кои доминираа строги минималистички линии, правоаголни маси и мебел со остри рабови, ентериерот сега станува помек и потопол.
Заоблените форми можат да создадат чувство на удобност и да внесат повеќе динамика во просторијата без да изгледаат нападно.
Ако сакате да го следите трендот без да претерате, најдобар избор е еден суптилен заоблен елемент, комбиниран со дрво, природни материјали и неутрални тонови. Така домот ќе изгледа модерно, но и пријатно.