Искрено писмо до сите несовршени мајки со хаотичен живот

Им се обраќам на мајките кои моментално пазарат во супермаркет со преполна корпа и дете кое безмилосно вреска додека сите луѓе зјапаат во нив. Сѐ ќе биде во ред!

Им се обраќам на мајките кои го читаат писмово моментално додека држат бебе во рацете, а другото 3-годишно дете прави хаос по дома. Знам дека се грижите да не ве отпуштат од работа ако го продолжите породилното отсуство. Сѐ ќе биде во ред!

Им се обраќам на мајките кои седнале надвор во дворот за да земат здив и да се опуштат со една цигара која никако да им ги смири нервите, додека детето трча и се валка во кал, а вие штотуку сте го избањале. Сѐ ќе биде во ред!

Имам да ви откријам една тајна: Сите мајки поминуваат низ истото.

Не ми е гајле што сте чуле или виделе. Вие не сте сами! Знам дека ги гледате на Фејсбук сите тие совршени мајки кои прават совршени работи со нивните совршени деца и ви доаѓа да заплачете. Но, не треба да заборавате дека тие ги објавуваат само забавните моменти. Средените мајки кои изгледаат како да се симнале од модна писта и имаат деца кои позираат како професионални фотомодели поминуваат низ истите маки како и вие. И тие менуваат пелени, само што не го објавуваат тоа на Инстаграм. Знам дека вие давате сѐ од себе!

Им се обраќам на мајките со солзи во очите кои не знаат дали можат да продолжат понатаму по целиот овој напор. Сѐ ќе биде во ред!

Им се обраќам на мајките кои не си ги смениле пижамите веќе цела недела. И на мајките кои погледнале во часовникот и виделе дека е 20 часот, а нивните деца сѐ уште не ја напишале домашната и згора на сѐ се лутат затоа што за вечера мора да јадат остатоци од ручекот кој не им се допаднал баш. Како и на мајките кои се кријат во тоалетот, очајно обидувајќи се да украдат две минути одмор без да им виси дете на ногата.

Знам дека се чувствувате осамено. Знам дека чувствувате како целиот свет да го носите на рамена. Знам дека ви е тешко да заспиете, а кога ќе се разбудите и ќе воочите дека е нов ден, ви се плаче од самата помисла на сите обврски што ве чекаат. Сѐ ќе биде во ред!

Можеби не ми верувате и тоа е сосема во ред. Само треба да знаете дека не сте сами.

Продолжете да го правите она што го правите и знајте дека еден ден во иднина, кога вашите деца ќе бидат пораснати, ќе сфатат колку труд вложувала мајка им за да бидат среќни. Ќе знаат низ колку многу љубов, болка и стрес сте поминале за да им овозможите најдобар можен живот.

И знаете што? Сѐ ќе биде во ред!

САКАТЕ ДА ГИ ДОБИВАТЕ НАШИТЕ СОДРЖИНИ НА ИМЕЈЛ?