Долгорочно клиничко истражување поддржано од американскиот Национален институт за здравје (NIH) покажало дека лицата со предијабетес кои усвоиле поздрав начин на живот имале значително помал ризик да развијат повеќе хронични заболувања во споредба со оние кои не направиле такви промени.
Студијата ги следела учесниците повеќе од две децении и ги споредувала ефектите од интензивна промена на животните навики, терапија со метформин и плацебо. Резултатите покажале дека токму промените во исхраната и редовната физичка активност имале најголемо долгорочно влијание врз зачувувањето на здравјето, додека кај групата која примала метформин не било забележано статистички значајно намалување на ризикот од појава на повеќе хронични болести.
Во рамки на програмата, учесниците биле советувани да ја намалат телесната тежина за најмалку седум проценти и да практикуваат најмалку 150 минути умерена физичка активност неделно. Ваквите навики се покажале како клучни за долгорочно подобрување на здравствената состојба.
Истражувачите анализирале 15 различни хронични заболувања, меѓу кои висок крвен притисок, срцеви заболувања, мозочен удар, хронична бубрежна болест, артритис, депресија, деменција, остеопороза и дијабетес. Кај лицата кои го следеле програмот за здрав начин на живот бил забележан околу 21 отсто помал ризик за развој на две хронични заболувања и 25 отсто помал ризик за појава на три или повеќе заболувања во споредба со контролната група.
Авторите на студијата истакнуваат дека резултатите уште еднаш ја потврдуваат важноста на здравите животни навики како најефикасен начин за превенција не само на дијабетес тип 2, туку и на низа други хронични заболувања кои се појавуваат со стареењето.