Претходно
Скротете го егото така што ќе се однесувате со понизност кон светот околу вас
Да се биде егоист никогаш не е добра особина, без разлика на она што некои луѓе би се обиделе да го кажат во своја самоодбрана. Од друга страна, понизноста е особина достојна за почит и чија цел е да го надмине егото. Но, зошто честопати ни преставува голем предизвик да изразиме понизност? Дали бидејќи честопати ја сметаме понизноста за знак на слабост, кога, всушност, е показател на голема внатрешна сила? Во продолжение прочитајте на кој начин можете да го скротите егото и да се однесувате со поголема понизност кон светот околу вас.
Прифатете го фактот дека сите сме луѓе и како такви, грешиме
Многумина од нас, кога не успеваме во нешто што ни е важно – на пример, работата или љубовната врска – се разнишува нашата самодоверба бидејќи навикнати сме да ја поврзуваме самодовербата со нашите успеси. Така, одеднаш почнуваме да мислиме дека сме лоши или недостојни и паѓаме во депресија и меланхолија. Понекогаш, процесот на закрепнување од целата ситуација може да биде долг и болен. Сепак, моќта на понизноста лежи во фактот дека ни дава сила да ги издржиме критиките и неуспехот и тоа секогаш потпирајќи се на нашите внатрешни вредности како луѓе. Така, секогаш кога нема да можеме да исполниме нечие очекување, понизноста ќе нè потсети дека и ние сме само луѓе, како останатите, и дека е сосема нормално да погрешиме.
Вежбајте медитација и самосвест
Според научниците, скромните луѓе имаат точна слика за себеси вклучувајќи ги и сопствените предности и недостатоци, а тоа им помага да увидат какви промени треба да направат во животот. Освен тоа, медитацијата може да ја зголеми нашата самосвест на начин што можеме да ги забележиме нашите емоции и чувства без да ги осудиме. Така, колку повеќе стануваме свесни за нашиот внатрешен свет толку полесно ќе ни биде да ги увидиме нашите нездрави верувања и постапките кои би можеле да го ограничат нашето битисување. Меѓу другото, обидете се да се однесувате и со поголема љубезност и поголемо разбирање кон вас самите.
Изразете благодарност
Преку зборчето „благодарам“ ние им пренесуваме на другите дека ја цениме нивната вредност. Благодарноста нè тера помалку да се фокусираме кон себе, а вниманието да го насочиме на оние околу нас – тоа е и белегот на скромните луѓе. Освен тоа, многубројни истражувања ја докажале и длабоката поврзаност меѓу понизноста и благодарноста. Можеме да заклучиме дека најважниот елемент на понизноста е стремежот кон оние наши особини кои го прикажуваат најдоброто од нас и го прават светот подобро место за живеење.
Откако прочитавте за понизноста, можеби ќе сакате да ги прочитате и 8-те животни вистини од кинескиот филозоф Лао Цу што ќе ви го променат животот.
Извор: themindsjournal.com
