Претходно
5 работи што не сте ги знаеле за Марија Кири
Датум: 08 дек 2021
Коментари: 0
На сите нам ни е добро познат фактот дека Марија Кири (1867-1934) живеела во период кога повеќето жени немале пристап до науката и образованието. Сепак, тоа не ја спречило да биде првата жена која ќе ја добие Нобеловата награда и првата и единствена личност што ќе ја добие наградата за две науки.
Француска физичарка со полско потекло, се стекнала со светска слава благодарение на нејзините истражувања во областа на радиоактивноста. Таа била чудо од дете и покажувала извонредни вештини уште на четиригодишна возраст кога научила да чита на руски и француски. Студирала хемија, математика и физика на Универзитетот „Сорбона“ каде открила два радиоактивни елемента: радиум и полониум. Овде го запознала и нејзиниот сопруг и партнер Пјер Кири. Во продолжение прочитајте повеќе занимливости за една од најпознатите научнички на сите времиња.
Марија Кири работела во скромна лабораторија
Кога помислувате на научници, најверојатно првото нешто што ви паѓа на ум е добро опремена лабораторија. За жал, лабораторијата на Кири била далеку од тоа. Голем дел од нивните истражувања биле спроведени во мала, тесна барака.
Марија Кири била херој од Првата светска војна
Кири помогнала да се спасат илјадници војници преку поставувањето бројни мобилни радиолошки единици кои биле користени на првите борбени линии од страна на армиските лекари. Оваа технологија им овозможила на лекарите полесно да прават рендгенски снимки на ранетите војници и да ги вршат неопходните операции.
Нобеловата награда била традиција во семејството
Семејството Кири се стекнало со пет Нобелови награди. Мари поседувала две, а сопругот Пјер една награда. Во 1935 година, ќерката Ирен Жолио – Кири по стапките на нејзините родители, заедно со сопругот Фредерик Жолио ја добиле Нобеловата награда како признание за нивното откритие во поглед на нови радиоактивни изотопи. Втората ќерка на Марија и Пјер Кири, Ева, се омажила за Хенри Ричардсон Лабуис, добитник на Нобеловата награда за мир како и претседател на УНИЦЕФ.
Алберт Ајнштајн бил голем фан на Марија Кири
Откако Пјер Кири го загубил својот живот во трагична сообраќајна несреќа, Мари морала да се соочи со тежок период на предрасуди и сексизам. Ајнштајн решил да ја охрабри во нејзината работа, па затоа ѝ пратил писмо во знак на поддршка. Во една прилика, таткото на модерната физика изјавил:
„Марија Кири е единствената од сите славни личности која не дозволила славата да ја подмити“.
Научна љубовна приказна
Мари го запознала Пјер откако дипломирала на Универзитетот Сорбона, а нивната заедничка љубов кон науката придонела да станат не само партнери во животот туку и во истражувањата. Пјер инсистирал неговата сопруга да биде подеднакво признаена кога ѝ била доделена Нобеловата награда за нивните научни откритија.
Откако ги прочитавте овие интересни факти за животот на Марија Кири, можеби ќе сакате да дознаете кои 5 жени го одбележале 19-тиот век.
Извор: discovermagazine.com
