Претходно
5 причини зошто е добро да се преселите во непознат град
Датум: 01 авг 2016
Коментари: 0
Преселбите се тешки, особено доколку се одлучите да живеете во град каде што не познавате никого. Но, доколку си дозволите одреден период на адаптација и се препуштите на новите нешта што ги носи новото место, таквиот чекор може да биде најдобрата одлука што сте ја донеле во вашиот живот. Колку што се луѓето повозрасни, толку постресно го доживуваат преселувањето, иако годините никогаш не треба да бидат пречка за започнување нов живот и искористување на сите можности кои се отвораат пред вас.
Но, доколку сте во вашите 20-ти и се двоумите дали да заминете во нов град, каде што можете да најдете нова работа, каде што ве чекаат нови предизвици и каде што темпото на живот целосно ќе ви се смени, сторете го тоа. Времето си минува, можете да останете уште долго во вашата удобна зона или да направите еден поголем чекор. Еве кои се петте причини поради кои е добро да се преселите во град каде што никого не познавате.
1. Моќ да паузирате
Преселбата во сосема нов град, каде што сте опкружени единствено со непознати луѓе, ви отвора можност да направите пауза во животот и да размислите до каде сте стигнале на приватен и на професионален план. Луѓето кои одлучуваат да започнат нов живот, во нов непознат град имаат време да се посветат на себеси, да се запрашаат што направиле, а што не направиле дотогаш во животот и кои им се новите цели кои сакаат да ги постигнат. Едноставно, за време на паузата имаат можност да размислат кои се нивните приоритети, да сменат одредени навики и размислувања и да започнат еден поинаков живот, кој можеби ќе ги направи и посреќни луѓе.
2. Предизвик за вашата удобна зона
Секој човек има некоја своја удобна зона од која што многу тешко може да излезе доколку нема доволно храброст и мотивација. Таму се чувствува безбедно и на секоја нова промена и нова одлука, којашто би му го сменила правецот на движење или одреден зацртан план, гледа како на одредена опасност. Со преселувањето во нов град, луѓето или работите на кои можете да се потпрете повеќе не се физички присутни. Вашето омилено место за излегување, чашата вино испиена со вашиот најдобар пријател во тешките моменти, вашето семејство, тоа се нештата кои многу ќе ви недостигаат. Но, дајте си време. Со преселувањето вие всушност ја проширувате вашата удобна зона и по некое време ќе бидете пријатно изненадени колку убави нешта и прекрасни искуства ќе ви понуди новиот град.
3. Побрзо созревање
Созревањето е процес којшто не е секогаш пријатен, но да бидеме искрени, тогаш човекот, преку своите грешки учи најмногу за себе и за светот. Преселувањето во нов град е пресвртница во која секако на крајот ќе бидете победник. Новото место и сосема непознатите луѓе ќе ве натераат да се запрашате кои сте и да откриете нови аспекти од вашата личност. Преселбата ќе ве направи посилни и посамоуверени, но секако ќе има и тешки моменти. Едноставно, прегрнете го новиот град и вашето ново искуство, а тоа ќе ви отвори нови патишта кон постигнување на зацртаните цели.
4. Се проширува кругот на пријатели
Преселбите со себе носат тешки моменти и носталгија. Но, придобивките од нив можат да бидат многу поголеми. Замислете колку нови познанства ќе стекнете во новиот град. Ќе се прошири листата на колеги, на пријатели, а ќе искусите и нова култура и обичаи за кои порано никогаш не сте слушнале. Новиот град ќе ви донесе нови пријателства кои ќе откријат нови аспекти од вашата личност, а ќе се прошират и границите на вашиот свет и начинот на кој ги гледате нештата. Секако, новите пријателства не можат да ги заменат вашите другари од детството и луѓето кои имаат посебно место во вашите срца, но можат да внесат поголемо искуство и нови знаења во вашиот живот.
5. Независност и слобода
Кога се преселувате во сосема непознат град ќе бидете оставени сами на себе. Така ќе научите подобро да ги користите своите способности и самите да се снаоѓате во најразлични ситуации. Ќе се изненадите колку многу нешта можете да направите без ничија помош, за што претходно не сте биле свесни. Новиот град ќе ве научи повеќе да верувате во себе. Преселувањето ќе ви даде една нова слобода, којашто доколку ја искористите на правилен начин ќе ви овозможи незаборавно патување кон вашите нови успеси.
