Македонската танчерка Мила Србиновска постигна уште еден голем меѓународен успех. Таа освои сребрен медал на IDO Европското првенство во All Style Battles, кое од 1 до 7 јуни 2026 година се одржува во Клагенфурт, Австрија.
Србиновска, која е членка на танцовиот клуб Break A Leg од Скопје, настапи во исклучително силна конкуренција составена од најдобрите европски батл танчери. Со својот настап успеа да стигне до големото финале и да ја освои титулата европски вицешампион.
Овој резултат е уште една потврда за нејзиниот континуиран успех на меѓународната сцена. Мила веќе е препознатливо име на македонската и светската хип-хоп сцена, а во 2024 година ја освои и светската шампионска титула во хип-хоп. Новиот медал од Австрија само дополнително ја потврдува нејзината припадност кон европскиот и светскиот танцов врв.
Среброто на Европското првенство претставува голем успех и за танцовиот клуб Break A Leg, како и за македонската репрезентација, која со години успешно ја претставува Македонија на најзначајните европски и светски танцови натпреварувања.
„Мила повторно покажа дека е една од најдобрите танчерки во Европа. Сребрениот медал на Европското првенство е огромен успех за неа, за нашиот клуб и за Македонија. Особено радува фактот што таа континуирано се наоѓа меѓу најдобрите на светот и Европа. Горди сме на нејзината посветеност, работа и карактер кои ја доведоа до уште еден голем резултат“, изјави Трајче Петковски од Break A Leg.
IDO Европското првенство во хип-хоп, попинг, брејкинг и All Style Battles ги обединува најдобрите танчери од цела Европа и важи за едно од најпрестижните натпреварувања во уличните танцови дисциплини.
Македонската репрезентација продолжува со настапите и во наредните денови од шампионатот, каде повеќе македонски танчери ќе се борат за нови финалиња и медали.
Со овој резултат, Мила Србиновска и Break A Leg уште еднаш докажаа дека Македонија има свое заслужено место меѓу најдобрите европски танцови нации.