Претходно
ТВ серија: Костуми (Suits)
Датум: 19 сеп 2012
ТВ серија за професионалните предизвици и за секојдневната борба да се биде најдобар во она што се работи
Главни улоги: Патрик Џеј Адамс, Габриел Махт, Рик Хофман
Жанр: драма, комедија
Креатор: Арон Корш
Премиера: 23 јуни 2011
Број на сезони: 2
Времетраење: 60 минути
Јазик: англиски
Наша оценка: 9
Ваша оценка: 
(56 гласа, просек: 9,79 од 10)
Loading...
Одамна не сме препорачале ТВ серија која е толку добра за да заслужи сериозна 9-ка. За ваква оценка, не е доволно таа да е само интересна, забавна и заразна, потребно е да биде сплет од овие неколку работи, но и да има нешто плус. Во „Костуми“ тоа е инспиративноста – чувството кое ви се создава додека ја гледате, кое ве држи кога ќе престанете и спонтано ги менува вашите погледи за професионалниот живот.
Харви Спектор е успешен адвокат во престижна адвокатска компанија, кој е познат по својот остроумен шарм и по тоа дека секогаш победува. Неговите обврски наложуваат да најми асистент, чие место случајно го пополнува Мајк Рос. Мајк никогаш не завршил правни студии, но многупати полагал правосуден испит за други. Има неверојатна способност за помнење, доволно е само еднаш да прочита нешто за тоа да остане запаметено во неговата глава. Импресионирајќи го Харви на интервјуто за работа, тој ја добива шансата да го живее својот сон.
Нека не ве одбива правниот аспект во приказната. Навистина, сè во серијата се базира на правото, но случаите се интересни, а нивното вешто решавање проследено со неуспеси и надмудрувања, „местенки“ и финти ќе направи да посакате да ја работите оваа работа, дури и ако вашиот сон е нешто друго. Хуморот во серијата е стегнат, вплеткан во куси интервали помеѓу редици сериозни правни дијалози. Просто, немате време да се изнасмеете кога ќе се случат.
И глумата во серијата е фантастична. Ќе биде невозможно да не го сакате Харви Спектор, без разлика дали како љубовник или како ваш идол, да се воодушевувате на држењето на неговата шефица Џесика – сопственичката на фирмата, да го презирате неговиот опонент Луис, да посакате да имате колешка како неговата асистентка Дона и да сочувствувате со Мајк, кога се сопнува на интригите кои му ги приредуваат поискусните.
Најсилно од сè е што во секоја епизода градуално се зголемува елементот на емотивност кој ги поврзува карактерите и прави да се чувствувате како да сте дел од нивниот живот.
Досега се излезени вкупно 22 епизоди организирани во 2 сезони, но ако почнете да гледате „Suits“, брзо ќе сфатите зошто продолжението закажано за јануари, 2013 изгледа толку далечно.
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
Само мала исправка серијата не е за сериозна 9ка, туку сериозна 10+++ 😀
Токму така серијата е чиста 10ка, ја обожавам. 🙂