Кога температурите се високи, многумина прво помислуваат на ладен туш како најбрз начин за освежување. Иако студената вода може веднаш да даде чувство на олеснување, таа не секогаш му помага на телото вистински да се разлади.
Според стручните објаснувања, кога кожата нагло ќе се изложи на студена вода, крвните садови блиску до површината се стеснуваат. Тоа значи дека помалку крв доаѓа до кожата, а токму преку кожата телото се обидува да ја ослободи вишокот топлина. Наместо да се разлади, организмот може да добие сигнал дека треба да ја „задржи“ топлината.
Особено треба да се внимава со многу студена вода или со нагло влегување во ладна вода по престој на високи температури. Таквата промена може да предизвика т.н. ладен шок – реакција при која се забрзува работата на срцето, се зголемува крвниот притисок и телото влегува во стрес. Ова може да биде ризично, особено кај лица со срцеви заболувања или проблеми со циркулацијата.
Но, ни премногу топол туш не е најдобро решение за време на жештините. Ако водата е потопла од телото, таа дополнително му пренесува топлина на организмот и може да го отежне природното ладење.
Најдобар избор во летните денови е млак туш.
Водата не треба да биде ледена, туку пријатно свежа – доволно ладна за да ве освежи, но не толку студена за да го „шокира“ телото. На овој начин организмот полесно ја исфрла вишокот топлина и се разладува постепено.
Покрај тоа, студената вода не е секогаш најдобра ни за хигиена. Кога се потиме, потта се меша со маснотии и бактерии на кожата, а премногу ладната вода потешко ги отстранува нечистотиите. Млаката вода подобро ги отвора порите и помага кожата да се исчисти поефикасно.
Затоа, следниот пат кога ќе посакате ледено студен туш поради жештината, размислете двапати. Освежувањето треба да биде постепено – млак туш, доволно течности, лесна облека и избегнување директно сонце во најтоплиот дел од денот.