Летото добива нова доза забава, смеа и познати гости. Ивана и Ем се враќаат на малите екрани со третата сезона на „Hot Stars“, емисија која и ова лето ќе донесе многу позитивна енергија, интересни разговори, игри, предизвици и моменти што ќе се прераскажуваат.
Новата сезона на „Hot Stars“ ќе биде во вистински летен ритам – со атрактивни локации, опуштена атмосфера, познати лица и многу изненадувања за гледачите. Форматот останува препознатлив по спонтаноста, добрата енергија и хемијата меѓу водителките, но оваа сезона ветува уште повеќе динамика и забава.
Во изјава за Кафе пауза, Ивана открива дека третата сезона ќе биде една од најзабавните досега.
„Оваа сезона дефинитивно ќе биде една од најзабавните летни сезони на ‘Hot Stars’ досега. Подготвуваме многу изненадувања, игри и предизвици за гостите, па публиката ќе има можност да ги види познатите личности во едно поинакво, поопуштено и многу позабавно издание. Сакаме секоја епизода да носи нова енергија, многу смеа и моменти што ќе се паметат“, вели Ивана.
Публиката и ова лето може да очекува гости од различни области – музика, телевизија, инфлуенсерство, спорт и јавна сцена. Освен познати имиња од Македонија, во новата сезона ќе има и гости од регионот.
„Ќе имаме навистина голем број познати гости од различни области – музика, телевизија, инфлуенсерство, спорт, јавна сцена — и тоа не само од Македонија, туку и од Балканот. Подготвуваме големи изненадувања за гледачите, па не би откривала премногу однапред, но можам да кажам дека ова лето ќе биде навистина интересно“, додава Ивана.
Токму во тоа е и шармот на „Hot Stars“ – гостите не се претставени само преку класични интервјуа, туку и преку ситуации во кои се гледа нивната спонтаност, смисла за хумор и вистинска енергија. Игри, предизвици, неочекувани прашања и летна атмосфера ќе бидат дел од секоја епизода.
На прашањето како би ја опишала новата сезона со три зборови, Ивана кратко одговара:
„Забавна, непредвидлива и летна.“
Третата сезона на „Hot Stars“ започнува оваа недела, а емисијата ќе се емитува секоја недела од 19:30 часот на Канал 5 телевизија.
За сите што сакаат лесна, позитивна и забавна содржина во летниот период, „Hot Stars“ се враќа како вистински избор за неделна вечер пред телевизор.