Поранешниот македонски кошаркарски ас Перо Антиќ предизвика бројни емотивни реакции во јавноста откако викендов лично го придружуваше на полуматурската вечер младиот Андреја Блажев, синот на неговиот прерано починат близок пријател Владимир Блажев – Панчо од „ДНК“.
Со овој човечки и благороден гест, Антиќ уште еднаш покажа дека вистинското пријателство не завршува со загубата, туку продолжува преку поддршката кон најблиските на оние кои повеќе не се меѓу нас.
На денот на полуматурската прослава, кога отсуството на таткото неизбежно се чувствуваше, Перо Антиќ се појави пред домот на семејството Блажев и лично се погрижи младиот Андреја да има достоинствено и незаборавно испраќање на еден од најважните моменти во неговото детство.
Кошаркарската легенда сподели и видео на социјалните мрежи, на кое упати кратка, но силна порака до синот на својот пријател:
„Блажев Јуниор. Среќна матура, лепотану“.
Објавата за кратко време предизвика лавина од реакции, коментари и поддршка од јавноста. Многумина го поздравија гестот на Антиќ, оценувајќи го како пример за вистинска човечност, лојалност и пријателство.
Владимир Блажев – Панчо беше еден од најпознатите и најсакани македонски музичари, а неговото заминување остави голема празнина кај семејството, пријателите, колегите и публиката. Зад себе ги остави синовите Андреја и Марјан, за кои секогаш зборуваше со неизмерна љубов и гордост.
Особено емотивна беше и објавата на мајката на полуматурантот, која јавно му се обрати на својот син по повод завршувањето на едно важно поглавје од неговиот живот.
„Едно поглавје завршено, само жалам што не сме сите на број. Оној најбитниот ни фали, но животот продолжува, сине. Ти посакувам успеси на секое поле, да си жив и здрав, твојот успех е и мој. Биди ми секогаш насмеан и позитивен, а пред сè човек со големо срце за секого“, напиша таа.
Во продолжение додаде дека неговата добрина е одраз на воспитувањето и љубовта со која растел.
„Твојата добрина е одлика на нашето воспитување. Те сакам со цело срце, твоја мама“, стои во емотивната порака.
Гестот на Перо Антиќ ја допре јавноста токму затоа што во себе носи нешто многу поголемо од еден убав момент за социјалните мрежи. Тоа е потсетник дека вистинските пријатели остануваат присутни и тогаш кога зборовите не се доволни, а поддршката значи повеќе од сè.
Оваа вечер Андреја ќе ја памети по својата полуматура, но и по луѓето кои покажаа дека љубовта, почитта и пријателството можат да бидат силен потпорен столб во најчувствителните моменти од животот.