Силно невреме проследено со пороен дожд, засилен ветер и појава на град попладнево го зафати Скопје, предизвикувајќи отежнато движење и проблеми во повеќе делови од градот.
Во краток временски период падна поголема количина дожд, поради што на одредени улици се создадоа наслаги вода, а сообраќајот се одвиваше со забавено темпо. Возачите беа принудени да се движат повнимателно, додека пешаците се соочија со поплавени тротоари и коловози на повеќе локации.
Невремето беше проследено и со силен ветер, а во делови од Скопје имаше и појава на град. Ваквите временски услови дополнително ја усложнија состојбата на терен, особено во деловите каде што атмосферската вода потешко се одлеваше.
По невремето, од Град Скопје информираа дека Кризниот штаб, заедно со екипите на јавните претпријатија, е целосно мобилизиран и подготвен за интервенции на терен, доколку има штети, поплави или потреба од итна реакција.
Градоначалникот Орце Ѓорѓиевски соопшти дека службите се во постојана координација со Центарот за управување со кризи, Министерството за внатрешни работи, ЕВН, Противпожарната бригада на Град Скопје и останатите надлежни институции.
Според најавите, екипите на Град Скопје ќе останат на располагање во текот на целата ноќ и ќе интервенираат онаму каде што ќе биде потребно.
Надлежните апелираат до граѓаните да бидат внимателни, смирени и да соработуваат со службите, особено доколку се движат низ подрачја каде што има насобрана вода или отежнат сообраќај.
Од Град Скопје посочуваат дека сите капацитети се ставени во функција со цел навремена заштита на граѓаните и спречување на поголеми последици од невремето.