Претходно
Ако се обидувате да ослабите со трчање, немојте да ги правите овие грешки
Ако се обидувате да ослабите со трчање, сте одбрале добра активност за да стигнете до вашата цел. Но, на патот до неа можеби правите одредени грешки кои ве спречуваат во тоа. Ова се најчестите од нив.
Погрешно пресметување на калориите
Факт е дека можете да согорите и до 500 калории за еден час трчање, но треба да гледате да не ги надоместите. Исхраната е многу важна во процесот на слабеење затоа што треба да внесувате помалку калории отколку што трошите. Ако навечер пиете газирани сокови или јадете двојно повеќе за вечера затоа што сте се измориле и сте гладни, тогаш бројките на вагата ќе забушаваат. Не е баш интересна работа да се прави, но мора да се посветите и на броење на калориите кои ги внесувате и трошите.
Избегнување на мастите
На телото му се потребни масти. Сигурно веќе знаете за разликата помеѓу добрите и лошите масти. Избегнувајте ги лошите и консумирајте ги добрите. Тие го поттикнуваат излачувањето на хормоните кои го регулираат гладот и затоа ве држат сити подолго време.
Трчање на празен стомак
Постои една голема заблуда дека трчањето на празен стомак предизвикува слабеење затоа што не сте консумирале калории, а сте потрошиле многу. Тоа не функционира така во практика и е голема грешка. Во таков случај телото прво ќе почне да ја користи енергијата од мускулите, а дури потоа ќе почне да ги согорува и мастите. Покрај тоа, ќе имате и помалку енергија за трчање и со тоа ќе согорите помалку, а ќе бидете и погладни кога ќе завршите со трчањето со поголема желба за внес на храна. Најдобро е да каснете некои лесно сварливи јаглехидрати 30-60 минути пред трчањето, како на пример парче леб со путер од кикирики или житарки.
Избегнување на оброкот после трчањето
После физичкиот напор на телото му е потребна енергија за да продолжи добро да функционира и затоа чувствувате глад. Исто така, поради заморот може и да не чувствувате потреба за храна, но кога ќе се одморите телото ќе сфати дека му таа му треба и ќе бидете многу гладни. Затоа каснете нешто веднаш по трчањето. Тоа не мора да биде цел оброк, овошје, смуди или чоколадно млеко ќе завршат добра работа.
Премногу калории во текот на трчањето
Избегнувајте да си каснувате по нешто додека трчате. Сувото овошје и енергетските плочки ќе додадат многу калории на дневното мени, а во тој момент нема многу да придонесат за намалување на гладот. За време на трчањето консумирајте само вода, а закуските и оброците оставете ги за пред и после трчањето.
Калорични пијалаци
Ако сакате да ослабите, исфрлете ги од менито калоричните пијалаци како газираните сокови, овошните сокови со додаден шеќер и алкохолот. Тие само додаваат калории без притоа да ве заситат. Алкохолот може дури и да го поттикне апетитот.
Бркање резултати
Не се форсирајте со повеќе трчање или со диетата за да постигнете брзи резултати. Тие не се веројатни, ниту се здрави по вашиот организам. Ако губите по еден килограм неделно, тоа е одлично. Одете чекор по чекор. Форсирањето со малку храна да трчате што повеќе ќе доведе само до повеќе глад.
Приспособувајте се
Во првите неколку недели ќе загубите повеќе килограми, но потоа телото ќе се навикне на тоа и ќе почне да штеди. Тогаш приспособете се на него и променете нешто во начинот на исхрана. На вашето тело веќе нема да му бидат потребни толку многу калории како порано кога сте тежеле повеќе и може да пробате, чекор по чекор, да внесувате помалку.
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
