Претходно
Здрави закуски кои вашите деца ќе ги обожаваат
Како што растат децата, така расте и нивната желба да каснуваат по нешто меѓу оброците. Но, многу спакувани грицки за деца се нездрави и честопати се полни со шеќери и вештачки состојки.
Наместо високо преработена храна, на вашето дете предложете му свежо или суво овошје, ореви, варени јајца, сирење, јогурт, хумус, маслинки, пуканки или кисели краставички. Можете да му подготвите смуди со малини, спанаќ, јогурт и мед. Исто така, можете да му направите и различни сендвичи, на пример со моцарела и со ситно исечени домати; со путер од кикиритки и со парчиња банана или со варено јајце, со авокадо и со домати.
Погледнете ги и овие 3 рецепти за здрави закуски кои се лесни за подготовка и можете да ги направите уште денес.
1. Енергетски топчиња
Енергетските топчиња можете да ги направите со ленено семе или со чиа кои се извор на растителни влакна, протеини и антиоксиданти. Нивниот вкус нема да биде поразличен од оној на колачињата кои ги купувате. Единствената разлика е тоа што овие енергетски топчиња се полни со хранливи состојки.
Потребни состојки:
- 80 г овесни снегулки
- 115 г мед
- 125 г путер од бадеми
- 55 г ленено семе или 110 г чиа
- 1 лажичка ванила
- 80 г суво овошје или чоколадни струготини
Начин на подготовка:
Измешајте ги сите состојки во еден сад, а потоа формирајте топчиња и ставете ги да отстојат во фрижидерот.
2. Чипс од кељ
Кељот се смета за суперхрана, бидејќи содржи многу хранливи состојки. Всушност, децата можат да ја добијат дневната доза на витамините А, Ц и К од само 1 чаша (65 грама) кељ.
Повеќето деца не би го јаделе овој зеленчук, но чипсот од кељ е многу вкусен и можеби ќе им го смени мислењето.
Потребни состојки:
- 1 снопче кељ
- 1 лажица маслиново масло
- 1 лажичка лук во прав
- 1/4 лажичка сол
Начин на подготовка:
Насечкајте го кељот, а потоа измијте го и темелно исушете го. Ставете го маслото и зачинете. Потоа распоредете го на хартија за печење и печете го во загреана рерна на 175 степени,10-12 минути.
3. Ќесадиља со путер од кикиритки и банана
Путерот од кикиритки е одличен извор на протеини и здрави масти, а бананата содржи калиум, витамин Б6 и растителни влакна.
Овој едноставен рецепт е многу вкусен и вашето дете сигурно ќе го обожава.
Потребни состојки:
- 1 тортиља од цели зрна
- 2 лажици путер од кикиритки
- половина банана
- 1/8 лажичка цимет
Начин на подготовка:
Распоредете го путерот од кикиритки низ целата тортиља. Насечете ја бананата и наредете ги парчињата на едната половина од тортиљата. Посипете цимет и преклопете ја тортиљата. Насечете на триаголници пред да послужите.
Можеби ќе ве интересира и овој рецепт за здрав, домашен крем од лешник.
