Претходно
Торта од палачинки: Наједноставниот рецепт за почетници
Тортите на безброј почетници во кујната им предизвикуваат страшни маки во текот на првиот обид и совладувањето на рецептот. Токму затоа, наједноставната торта од палачинки е идеалното решение. Наполнета со бадеми и збогатена со павлака, ќе ги задоволи сетилата на сите љубители на слатките, а ќе признаете дека со палачинките е тешко да се погреши.
Потребни состојки за палачинките:
- 5 јајца, одвоени жолчка и белка
- 50 грама шеќер
- 50 грама брашно
- 175 милилитри млеко
- 50 грама растопен путер, половина во смесата, а половина за премачкување на тавата
- ½ лажица прашок за печиво
- прстофат сол за снег од белки
Потребни состојки за полнењето:
- 3 јајца, одвоени жолчки од белки
- 25 грама шеќер во прав
- ½ лажица ванилин шеќер
- нарендана кора од еден лимон
- 115 грама мелени бадеми
За премачкување:
- Околу 150 милилитри кисела павлака
Подготовка на палачинките:
Посебно изматете го снегот од белките. Жолчките изматете ги со шеќерот, додајте млеко, брашно, растопен путер и на крај лесно измешајте го снегот од белките. Од оваа смеса испечете четири дебели палачинки на умерен оган во тава со иста големина како калапот за торта во кој подоцна ќе ги наредите, премачкан со растопен путер.
Подготовка на полнењето:
Постапката со јајцата е иста како и кај смесата со палачинките. Изматете ги белките одвоено. Во друг сад изматете ги жолчките, додајте шеќер, кора од лимон, лесно измешајте го снегот од белките и на крај додајте ги мелените бадеми.
Завршно редење на тортата:
Во калап за торта, најдобро обложен со хартија за печење, ставете една палачинка и премачкајте ја со третина од полнењето. Повторете ја постапката уште два пати. Последната палачинка премачкајте ја со кисела павлака. Печете ја тортата од 20 до 25 минути на температура од 200 Целзиусови степени. Послужете ја посипена со шеќер во прав.
