Претходно
Шминка за уши: Би го пробале ли овој нов храбар тренд?
Се чини дека новите трендови во шминкањето никогаш не стивнуваат. Откако го видовме шарениот свет на маскарата, ни дојде уште еден нов тренд кој вклучува шминкање на увото. Всушност, уметноста зад овој вид шминка е тренд за убавина кој е доста популарен на Инстаграм. Според Мари Клер, овој тренд започнал пред две години благодарение на мејкап артистот Том Печо, за време на Париската модна недела, а од тогаш е користен и од повеќе шминкери кои на Инстаграм демонстрираат како да го направите тоа.
Очигледно е дека шминкањето на увото е тренд и на модната недела и кај шминкерите, но што е со нас, обичните луѓе? Би се осмелиле ли и вие да го следите овој тренд или сепак ќе го испробате само во приватноста на вашиот дом? Не можете да знаете дали ви одговара сѐ додека не се обидете. Па, доколку сте желни да видите како би изгледале со шминка на увото, во продолжение погледнете неколку начини кои ќе ви покажат како да го направите тоа.
1. Користете светкава сенка
Изберете две нијанси на бои: Бакарна и златна. Започнете со нанесување боја од страната на увото. Комбинирајте ја според тоа како ви одговара, а имајте ја предвид и бојата на вашата коса.
Препорачливо е да избегнувате користење златни или жолти сенки во внатрешноста на увото, за тоа да не изгледа нечисто. Потоа, со помош на тврда четка додајте сјај колку што сметате дека ви е потребен.
Но, овој изглед дефинитивно не е наменет за секојдневието, па доколку сакате да го испробате, тогаш зачувајте го за некој посебен настан.
2. Прецизна линија
Следниот начин на кој можете да го нашминкате вашето уво, е инспирација од Инстаграм профилот на Виолет Серет, односно од нејзината шминка која изгледа како да имате накит на увото. Користете го омилениот ајлајнер и прецизно повлечете линија што ќе ги следи неговите линии. Ваше е како сакате да го направите ова.
Потоа, земете водоотпорна сенка во розово-златна боја (или друга боја по ваша желба) и со мала четка нанесете врз исцртаната линија.
Овој изглед делува попривлечно од претходниот затоа што вака ќе добиете повеќе внимание. Од далеку изгледа како да носите накит, но од блиску луѓето ќе може да ја забележат вашата уметност.
Сепак, обидете се со ова само доколку имате многу трпение и стабилна рака.
3. Манжетни на увото
Овој начин на шминкање е инспириран од изгледот на Том Печо на Ентони Вакарело во 2014 година и тоа не е особено тешко за да се постигне. Користете ајлајнер за да го обоите долниот дел од вашето уво.
Може да додадете малку сјај, но не користете производи кои содржат масло, затоа што тие ќе ја уништат бојата.
Овој начин не одзема многу време, а изгледа привлечно.
Па, доколку сте храбри, испробајте го овој тренд и забележете како останатите ќе реагираат на вашиот нов изглед!
