Претходно
Наместо да гледате телевизија, правете ги овие 10 нешта откако ќе се вратите од работа
По неколку напорни состаноци, викања од шефот и сообраќаен метеж, сигурно едвај чекате да стигнете дома и да седнете пред телевизор. Можеби ќе ја пуштите омилената серија, а можеби со часови ќе вртите низ каналите. Но, дали е ова правилен начин да го потрошите вашето скапоцено време?
Денес може да биде вистински предизвик да најдете време само за себе. Постојано сте зафатени, па наместо залудно да го трошите и она малку слободно време што го имате, зошто да не го искористите за нешто корисно? Погледнете ги 10-те активности со кои би можеле да го замените гледањето телевизија.
1. Станете учител
Учител не е личноста којашто знае сè, туку личноста којашто може да ве научи на сè што знае. Па без разлика колку сте добри во нешто, секогаш можете да го пренесете вашето знаење на некој друг. Ако на пример сте добар готвач, зошто да не научите уште некој како да се снајде во кујната? Ова ќе ви помогне да ја зголемите вашата самодоверба.
2. Прочитајте книга
Лидерите се читачи, па наместо да го трошите времето пред телевизор нека ви стане навика секојдневното читање. Вистинска магија е да соберете нечие животно искуство само со неколку часа читање. Одбирајте книги за мотивација и самопомош коишто ќе ви помогнат да напредувате.
3. Бавете се со уметност
Откако ќе се вратите од работа почнете да цртате, да пеете, да танцувате или научете да свирите на некој музички инструмент. Секој вид креативно изразување е одличен начин да се ослободите од стресот.
4. Медитирајте
Ништо нема да ве релаксира како 10-минутна медитација. Ова е најдобрата ментална вежба со којашто ќе го смирите вашето тело, ќе го релаксирате вашиот ум и ќе ја откриете моќта на внатрешниот мир.
5. Придружете се на некоја група
Денес е навистина лесно да најдете група луѓе со кои имате исти интереси и да ги споделите вашите искуства. Разговорот со истомисленици е многу подобар од бесцелното гледање телевизија.
6. Почнете да пишувате
Нема потреба да станете следниот Пауло Коелјо. Без разлика дали имате бујна фантазија и дали сте добри во пишување, обидете се да го вметнете пишувањето во секојдневниот распоред.
7. Домашни обврски
Сигурно веќе знаете дека домот бара секојдневно чистење, па правете го тоа наместо да гледате телевизија. Ќе се изненадите од менталното ослободување што ќе го доживеете откако ќе го исчистите просторот во којшто живеете.
8. Излезете со пријателите
Колку време поминало од последната средба со вашите пријатели? Сега е вистинскиот момент да излезете од удобната зона и да го активирате вашиот социјален живот.
9. Поминувајте време со семејството
Дигиталниот свет целосно ја намали интеракцијата со реалниот свет, па важно е да ги одредите вашите приоритети. Откако ќе се вратите од работа, подобро е да поминете малку време со вашето семејство наместо да гледате телевизија.
10. Едноставно седете и восхитувајте ѝ се на природата
Ако не сте подготвени за ниту една од наведените активности, тогаш едноставно одете негде, седете во тишина и само восхитувајте ѝ се на природата.
Ако сакате да ја зголемите вашата продуктивност овие лесни техники ќе ви помогнат во тоа.
