Претходно
9 одлични идеи за подарок на трудница
Сите познаваме некоја жена која во моментов е во блажена состојба. Без разлика дали е пријателка, член од семејството или колешка, тоа е огромна причина за славење. Прославата за доаѓањето на новиот член можеме да ја започнеме уште за време на бременоста така што на идната мајка ќе ѝ подариме соодветен подарок.
Шопингот за подарок за идни мајки треба да вклучува предмети кои се корисни, но и слатки. Тоа може да се производи за разубавување, работи кои го намалуваат стресот или ултраудобна облека.
1. Накит
Накитот како подарок секогаш има сентиментална вредност. Подарете ѝ нежно ланче со натпис „мама“ или „mom“ - тоа дефинитивно ќе ѝ измами солзи радосници.
2. Торба или ранец за мајки со бебиња
Ваквите торби и ранци се многу практично направени за да соберат многу работи во нив. Имаат посебни прегради за она што секогаш треба да им е на дофат на мајките со бебиња, најчесто се водоотпорни и се доста цврсти за да можат да издржат поголема тежина.
3. Труднички памучни пижами
Трудничките памучни пижами се многу меки и удобни и имаат посебен дел околу струкот кој се прилагодува на големината на стомакот. Толку се удобни, што многу мајки продолжуваат да ги носат и после бременоста. Покрај тоа, многу модели имаат дизајн кој овозможува брзо откривање на градите што значително го олеснува доењето.
4. Удобни патики без врвки
Како што ќе напредува бременоста, на трудницата ќе ѝ станува сѐ потешко да се наведнува и да пешачи; затоа удобни патики без врвки би биле полн погодок.
5. Бескофеински чај или кафе
Сите трудници се обидуваат да одбегнуваат кофеин, па затоа кутија бескофеинско кафе или бескофеински чај е одличен подарок.
6. Дневник за трудници и млади мајки
Во дневникот за трудници и млади мајки, тие ќе може да ги внесуваат сите важни датуми и моменти од бременоста, како и од првите месеци на бебето. Првиот преглед, првото отчукување на срцето на бебето, датумот кога го дознале полот или пак, датумот на првото запче, првиот изговорен збор итн…
7. Кутија со омилените чоколадни бонбони
Апетитот и желбата за јадење слатко за време на бременоста се големи, па затоа кутија со омилените чоколадни бонбони ќе ја направи многу среќна секоја жена во оваа состојба.
8. Крема против стрии
Периодот на бременоста, покрај убав, е и стресен за секоја жена. Промените на телото може да ја направат жената во овој период да се чувствува незадоволно од својот изглед и тело. Стриите се еден од проблемите кои се појавуваат за време на бременоста и за жал остануваат цел живот. Затоа употребата на крема против стрии уште од првиот месец од бременоста може значително да го намали ризикот од нивна појава.
9. Масло за обнова на косата
За време на бременоста, косата станува кршлива и сува, па затоа масло за обнова на косата е одличен подарок за секоја трудница.
Автор: Катерина Каланоска
