Претходно
Викенд книга: „Статистичка веројатност за љубов на прв поглед“ – Џенифер И. Смит
Можеби би претпоставиле дека веројатноста за љубов на прв поглед е висока, но што ако не е?
Наша оценка: 8/10
Ваша оценка: 
(24 гласа, просек: 9,21 од 10)
Loading...
Љубов на прв поглед, ха? Да бидеме реални, не постои такво нешто. Ако ме прашате мене, љубовта е резултат на нешто што се гради подолго време, нешто што треба да созрее. Но, хемијата и те како се создава на прв поглед и тука нема многу комплицирани прашања и размислувања, едноставно магијата е тука. „Статистичка веројатност за љубов на прв поглед“ звучи како вистинска романса нели? Ако претпоставите дека веројатноста за такво нешто е многу висока, но што ако не е? Книгата на Џенифер И. Смит всушност зборува за прекрасните случајности кои ни ги носат најубавите моменти на овој конфузен и по малку фрустрирачки свет, особено оние случајности кои имаат моќ да нè поврзат со важна личност која може да ни го промени животот. А Џенифер креирала слатка приказна за двајца млади за да го пренесе токму тоа.
Доделуваме 2 книги во соработка со издавачката куќа Сакам книги
Хедли мрази аеродроми. Ги мрази гужвите, тесните авиони, мрачните сценарија кои ѝ поминуваат низ глава благодарение на нејзината фобија а уште повеќе мрази што сега мора да лета до Лондон за да присуствува на свадбата на нејзиниот татко. Помина веќе долго време откако нејзините родители се разделија и Хедли всушност досега требаше да се навикне на фактот дека нејзиниот татко живее преку океан и има сосема нов живот, но чувството на горчина и бес сè уште тлее во неа. Таа доцни на аеродром цели четири минути, што и не е многу, но сепак Хедли го испушта авионот и сега постои голема шанса да задоцни на свадбата на која не ни сака да оди. Среќа, конците на судбината интересно се заплеткуваат па Хедли се запознава со симпатичниот Оливер кој е на наредниот лет со неа и галантно се понудува да ѝ го носи куферот наоколу. Оливер е Англичанец кој студира на Јејл, но не сака да открие што, има одлична смисла за хумор и омилен автор му е Дикенс. Плус, одлично му оди од рака кога треба да ѝ помогне на Хедли да ги надмине нападите на паника. Сакате да знаете за уште една симпатична случајност? Седиштето на Хедли е 18А а седиштето на Оливер е 18В. Како и да е, овие двајца поминуваат неколку часа на аеродромот и плус цела ноќ во авион што е сосема доволно за „хемија на прв поглед“. И како што обично се случува на аеродромите во сите овие романтични приказни, Оливер ја бакнува, се разделуваат во гужвата без да разменат контакт и статистичката веројатност хемијата на прв поглед да премине во љубов се симнува на нула. Хедли успева некако навремено да стигне на свадбата на татко ѝ и во еден момент во целиот тој хаос од измешани чувства сфаќа дека нешто е изменето.
Раскажувањето и динамиката се одлични, соодветни за приказната која нема тенденции да биде епска љубовна драма туку едноставно топла приказна со прилично едноставни и секојдневни ликови. Пред некое време споменав дека книгата „Светот не е фабрика за исполнување желби“ ми ги измести критериумите особено кога станува збор за ваков жанр и кога се раскажува за љубовта на млад пар, така што не верувам дека во скоро време ќе наидам на некои кои можам да ги ставам на исто место со Хејзел и Августус, но и овие двајца прилично добро се рангираа на листата. Интересните разговори, начинот на кој се поврзуваат и се разбираат е дефинитивно голем плус за целата приказна. Од друга страна, книгата обработува проблем кој за жал е сè почест и во нашата поблиска околина, тешкотиите низ кои поминуваат разделените семејства и како децата се справуваат со тоа особено во тинејџерски години. Мислам дека младите читатели кои можеби доживеале такво нешто ќе успеат да се пронајдат во оваа топла приказна и можеби ќе си помогнат полесно да го пребродат сето тоа.
Изданијата на Сакам Книги можете да ги набавите од сите поголеми книжарници.
За да учествувате во наградната игра треба да оставите коментар, да го твитнете постот или да го пинувате на Пинтерест, користејќи го хаштагот #СакамКнигаОдСакамКниги и вашето име и презиме (ако не може да се прочита точно од вашиот профил). Имате време до недела, 11 јануари 2015.
Добитниците ќе бидат објавени на профилите на Кафе пауза на Фејсбук, на Твитер и на Пинтерест, а наградите ќе бидат доставени по пошта.
#СакамКнигаОдСакамКниги