________________________________________________________________________________________________________
Бразил е надреалистичка, мрачна визија за „совршена“ иднина каде технологијата е супериорна. Инспириран од познатата „1984“ напишана од Џорџ Орвел, секој кој живее во општеството кое е отсликано во 1984, а потоа и во Бразил, е постојано набљудуван од владата (Големиот Брат) која забранува љубовта и емоциите на луѓето да му застанат на патот на успехот.
_____________________________________________________________________________________________________________

Режисерот Тери Гилиам, кој важи за еден од најдобрите режисери во историјата на кинематографијата, најпрвин сакал филмот да го нарече токму 1984. Бразил ја претставува имагинацијата како единствениот излез од бесмислен и проблематичен свет.

Полицаец: „Ова е сметката за вашиот сопруг… а ова е мојата сметка за вашата сметка.“

Во текот на филмот приказната се фокусира на Сем Лори (Џонатан Прајс), просечен работник од средната класа изгубен во масивниот бирократски систем кој доминира низ целиот филм. Сем, излезот од овој систем го наоѓа во своите соништа и фантазии, во нив тој има крилја, тој е херој кој ја спасува својата дама од огромниот самурај. Приказната од филмот се испреплетува во потрагата на Сем по девојката од неговите соништа, што е посложено одошто звучи.
.

Приказна: Се започнува со печатна грешка. Откако името на криминалецот Татл ќе биде грешно запишано како Батл, приказната почнува да се заплетува. Невиниот Батл ќе биде по грешка отстранет од општеството, наместо криминалецот кој сите го бараат (Роберт Де Ниро). Кога Сем го посетува станот каде живее семејството на грешно осудениот Татл, и се труди да ја олесни и објасни ситуацијата, тој ја здогледува девојката од неговите соништа – Џил Лејтон. Иако Сем е тој кој се труди да ја коригира направената грешка и последиците од истата, тој е тој кој се вовлекува сè повеќе и повеќе во проблемите кои таа ги предизвикува. Неговата ситуација уште повеќе се влошува кога тој доаѓа во контакт со вистинскиот Татл.

(2) Бразил

Кинематографија: Бразил е помеѓу првите пет од 20те најдобри филмови со научно-фантастична тематика, како и меѓу првите 10 на листата од 50 култни филмови. Изгласан е за најдобар филм во 1985 година. Филмот го има визуелниот стил и имагинацијата што го прави прекрасен за гледање, но и неговите идеи кои го прават филмски класик.

Џек Линт: „Не е моја вина што резултатите за состојбата на Батл не се појавија во досието на Татл!“

Интересни податоци: Бразил е еден од најдобрите филмови на овој феноменален режисер и можеби најмрачниот пред снимањето на „Дванаесет Мајмуни“ (со Брус Вилис). Тој е првиот филм кој тој го снима после „Монти Пајтон“.

Кога Гилијам ја вршел селекцијата на актери, тој намерно одбирал непознати, сè уште не развиени, но талентирани актери.

Бразил го добива името по песната која е одбрана да биде главна музичка тема во филмот – “Aquarela do Brasil”.

(4) Бразил

Кога и како да го гледате? Филмот е „измислен“ да биде гледан во оние моменти кога знаете дека сакате да видите нешто квалитетно, легендарно, нешто од што ќе можете да научите многу и нешто што ќе ве натера да размислувате. Тој можеби засекогаш ќе го смени начинот на кој ги резонирате работите околу вас.

Слични филмови: „Дванаест мајмуни“ (Twelve Monkeys), „Имагинариумот на доктор Парансус“ (The Imaginarium of Doctor Parnassus), „В за Вендета“ (V for Vendetta)