Претходно
Зошто е убаво да имате машина за шиење во својот дом?
Иако ви се чини како голема инвестиција, причините за купување на машина за шиење се целосно легитимни. Еве само мал дел од нештата кои можете да ги направите, а кои веруваме ќе ви ја разбудат желбата за еден малку покреативен шопинг.
1. Уникатна облека
Најдобрата работа во купувањето на машина за шиење е што ќе можете сами да си ја сошиете омилената облека. Секако, ова не е лесна задача, но постојат едноставни модели кои би можеле да ги усовршите со малку напор и трпение. Кога ќе навлезете во работата, ќе уживате во одбирањето на материјали, бои и модни додатоци. На крајот на краиштата, тоа ќе биде ваш уникатен дизајн, со кој навистина ќе се гордеете.
2. Сам свој мајстор
Дури и да не шиете сами, ќе бидете способни да ги поправате неправилностите во облеката што веќе сте ја купиле. Со ова ќе заштедите пари и ќе бидете позадоволни со тоа како изгледате. Со еден збор, нема да зависите од други и ќе си бидете сам свој мајстор!
3. Костуми за маскенбал
Кога дома имате машина за шиење, неизбежно е и сами да си ги направите костумите за наредниот маскенбал. Тие секако ќе изгледаат многу подобро од оние во продавниците и што е најважно, ќе бидат уникатни.
4. Кадифени играчки
Со машината за шиење ќе можете да изработувате и кадифени играчки. Шемите се лесни и нема да ви биде потребно многу време. Најмладите во семејството секако ќе уживаат во процесот. Па, зошто да не се обидете?
5. Креативност
Кога имате нешто вакво при рака, на креативните идеи ќе им нема крај. Можете да правите најразлични чанти, торбички за чување ситни предмети или пак нова облека за куклите. Доколку имате пософистицирана машина, и везовите би биле одлична идеја. Навистина, можни се безброј креации.
6. Декорирање на домот
Машината за шиење можете да ја користите и кога е потребно да го декорирате домот. На пример, перниците се многу лесни за изработка. Доколку пак сте расположени за нешто поголемо, направете си лично ваша завеса или покривка за кревет.
7. Старото станува ново
Ваквата направа ќе ви овозможи освежување и трансформирање на старите работи. Редизајнирањето на износената облека може да биде многу забавно. И не само тоа. На пример, можете старото ќебе да го претворите во совршено катче за домашното милениче. За што и да се одлучите, ќе бидете среќни и задоволни со фактот дека старото станало ново и повторно употребливо.
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
