Претходно
Зошто е најдобро во 20-тите години да престанете да земате пари од родителите?
Постојат родители кои можат да си дозволат да ги помагаат своите деца финансиски и да им плаќаат школување, рата за стан, рата за автомобил… Но, има и такви кои иако не се финансиски многу моќни, сакаат нивните деца да имаат сè што им е потребно, па за да обезбедат доволно финансии работат деноноќно. Притоа се откажуваат од реализирање на своите потреби, а финансиите ги пренасочуваат единствено кон потребите на своите деца. Не може да се каже кои родители постапуваат правилно, затоа што секој го посакува најдоброто за своите најмили. Сепак главната одлука треба да ја донесат децата. Доколку сте во 20-тите години од животот, можеби треба да застанете и да размислите дали е во ред сè уште да земате пари од вашите родители. Сега сте во најдобриот период од животот кога треба да размислите за финансиска независност, затоа што тоа многу ќе ви помогне во понатамошниот живот.
1. Потребно е да прогласите независност
Овој период од животот е најважен за преземање на овој чекор. Да станете финансиски независни е многу важен сегмент од вашиот живот, затоа мора да си поставите цел да пронајдете добро платена работа. Кога ќе ја почувствувате предноста на финансиската независност, ќе добиете слобода, а нештата ќе почнат да се местат онака како што сте си ги замислувале.
2. Кога еднаш ќе го сторите тоа, потоа е тешко да престанете
Сосема е во ред да земете понекогаш, на пример, пари за гориво или слична потреба, за која што во моментот немате финансии, но доколку секој месец барате пари од родителите да исплатите наем за стан, да си купите храна, да платите рата за кредит, тогаш треба да размислите до кога ќе го правите тоа. Родителите можат да помагаат, но не и да ве издржуваат. Доволни им се нивните сметки, затоа обидете се и дајте сè што можете за самите да си ги плаќате своите трошоци и потреби.
3. Родителите повеќе ќе ве почитуваат
Нема посреќни родители од оние кои ќе го видат своето дете независно. Тие се среќни што воспитале човек, кој во своите 20-ти години дава сè од себе за својата финансиска стабилност. Не постои родител кој не би бил среќен да го види своето дете како самостојно заработува и се грижи за своите финансии.
4. Го избегнувате моментот да го користат тоа против вас
Една од најиритирачките работи е кога родителите им даваат финансии на своите деца, а потоа во еден момент им го „удираат“ тоа в лице. Доколку финансиски зависите од своите родители, при секоја помала или поголема расправија, тоа ќе биде употребено против вас. Затоа е потребна финансиската стабилност. Сите сме свесни дека парите не растат на дрво. Потрудете се да работите напорно, па некогаш и по повеќе работи истовремено. Притоа, нема што да изгубите, затоа што 20-тите години се период кога човек се стекнува со вештини и со работна навика. Доколку тогаш успеете да се осамостоите, тогаш во понатамошниот живот полесно ќе ги надминувате проблемите, како на професионален, така и на приватен план.
