Претходно
Воспаление на грло: Кога можеме да го излекуваме сами, а кога помошта од доктор е задолжителна?
Во зависност од тоа дали воспалението го предизвикува вирусна или бактериска инфекција, можно е да го санирате самостојно или со помош на доктор и употреба на антибиотици.
Првиот симптом на вирусна или бактериска инфекција најчесто е воспаление на грлото, а зависно од тоа што ја предизвикува несаканата појава, таа може да трае кратко или да нè мачи неколку дена и да се претвори во здравствен проблем кој мораме да го лекуваме со здравствена помош.
Најпрво, како да правите разлика помеѓу воспаление предизвикано од вирусна инфекција и воспаление предизвикано од бактериска инфекција?
Воспаление на грло предизвикано од вирусна инфекција:
- Настапува постепено
- На почетокот се карактеризира со благо чувство на пецкање во грлото кое потоа се проширува
- Голтањето е најчесто благо отежнато
- Следува грозница и кашлица
- Се санира без здравствена помош, со топли напивки, пастили, прополис или разни домашни рецепти
Воспаление на грло предизвикано од бактериска инфекција:
- Настапува нагло
- Грлото е црвено, болно и натечено
- Зависно од сериозноста на инфекцијата, можно е отекување на лимфните јазли во областа околу вратот
- Голтањето е многу отежнато
- Појава на бели дамки на крајниците
- Губење на гласот
- Покачена телесна температура, губење апетит и слабост
- Се лекува со помош од доктор, најчесто со препишување на вистинскиот антибиотик
Во зависност на тоа кој дел од грлото го зафаќа, воспалението можеме да го поделиме на:
- Воспаление на фаринксот (фарингитис)
- Воспаление на крајниците (тонзилитис)
- Воспаление на гркланот и гласилките (ларингитис)
Независно од тоа кој тип воспаление на грло имате, клучно е да ја спречите дехидрацијата за грлото постојано да биде влажно. Затоа треба да внесувате многу течности.
Можете да испробате и разни благотворни домашни рецепти како чај од лук и нане, што имаат силни антибактериски и антивоспалителни дејства, па затоа се добар избор и кај вирусните и кај бактериските инфекции на грлото. Гаргарата со солена вода е уште еден проверен начин за ублажување на воспаленото и болно грло.
Направете и домашни напивки од мед и ѓумбир, а доколку не сакате ѓумбир тогаш изберете напивки на база на лековити билки како на пример жалфија и мајчина душица. Доколку повторно ја чувствувате болката, погледнете ги и овие намирници коишто со сигурност ќе ви ја ублажат болката во грлото.
