Претходно
Водич за правилно нанесување руменило според обликот на вашето лице
Ако мислите дека нанесувањето руменило е крајно едноставно, размислете уште еднаш! Ако некогаш ви се случило да не ви се допадне како сте нашминкани, тогаш најверојатно не сте го следеле вашиот облик на лице, а верувале или не, тоа е многу важно! Исто како што на сите девојки не им стои ајлајнер или одредена боја кармин, исто така не може сите девојки на ист начин да нанесуваат руменило. Затоа, најнапред погледнете го вашиот облик на лице, а потоа земете ја четката и руменилото во раце!
Срцевидно лице
Лицето со облик на срце е издолжено, со високи јаболкници и тесна брада. Руменилото би требало да го нанесете на јаболкниците, скоро во облик на буквата „С“, од средина на образите па нагоре.
Долгнавесто лице
Ако вашето чело, образи и вилица се на иста ширина, вашето лице има долгнавест облик, како еден вид „мек“ правоаголник. Ставете руменило на средина на јаболкниците, а потоа благо размачкајте го накај носот од страна. Исто така, нанесете малку руменило и на слепоочниците, покрај веѓите.
Квадратно лице
Доколку имате ваков облик на лицето, најверојатно е дека имате „прави“ страни и рамни вилици, па со руменилото малку ќе го омекнете вашето лице. Нанесете го преку целиот образ, од најнискиот дел па нагоре, кон веѓите. Потоа, суптилно нанесете руменило од внатрешната страна на веѓите кон носот. Слободно ставете малку и на усните и капаците. Зарем сега не изгледате прекрасно?
Тркалезно лице
Кај овој облик на лице, највпечатливи се образите, па затоа нив треба да ги „коригирате“ со помош на шминката. Насмевнете се и на највисоките точки од јаболкниците ставете руменило, размачкувајќи го кон надвор, накај ушите.
Овално лице
Овалното лице го карактеризираат благо истакнати образи, додека челото и вилиците се нешто пократки. За најдобар ефект, руменилото нанесете го на најистакнатите делови на јаболкниците, а потоа благо размачкајте го нагоре, накај слепоочниците.
