Претходно
Совети од балерина: Како да ја подобрите вашата флексибилност за само 4 недели?
Флексибилноста носи многу придобивки – од држењето на телото, до изведување на вежбите во теретана. Покрај тоа, за неа потребни се само неколку минути во текот на денот.
Саси Грегсон Вилијамс е поранешна балерина и таа тврди дека воопшто не е невозможно да станете флексибилни, без разлика како изгледате или кои се вашите вештини.
„Потребни се четири недели за да се забележи визуелна промена и три месеци постојано истегнување за драстично подобрување. Препорачувам да се истегнувате секој ден по само 5 до 10 минути.“
Па ако сакате да го подобрите вашето држење, подобро да ги изедувате вежбите во теретана или само сакате да ги воодушевите пријателите со вашите движења, погледнете ги вежбите предложени од Саси.
1. Истегнување на тетивите
Со оваа вежба ќе ги истегнете тетивите, листовите и грбот, а истовремено ќе се чувствувате неверојатно.
Застанете со раширени нозе и почнете да го спуштате долниот дел од телото. Почетниците нека ги прекрстат рацете и нека се држат за лактите додека се спуштени надолу. Ако сте малку понапредни, обидете се да ги прекрстите рацете и така да ги допрете стапалата. Држете ја положбата 30 секунди.
2. Истегнување за трчање
Оваа вежба ги истегнува вашите тетиви и листови.
Почнете во клекната положба и истегнете ја едната нога напред пред вас. Поставете ги рацете на подот покрај истегнатиот лист и почнете да го притискате ‘рбетот кон стомакот за да го задржите исправен. Држете ја положбата 30 секунди, па повторете со другата нога.
3. Отворање на колкови
Оваа вежба е одлична ако сте поминале цел ден во седење бидејќи ги истегнува колковите и квадрицепсите.
Започнете во клекната положба и истегнете ја едната нога наназад. Спротивната рака поставете ја на подот. Свртете се и отворете го телото кон предната нога. Кренете ја раката горе и гледајте кон таванот. Држете ја положбата 30 секунди и повторете на другата страна.
4. Не заборавајте на листовите
Според Саси, луѓето често ги запоставуваат листовите кога се истегнуваат, но тие се особено важни за одржување на флексибилност на долниот дел од телото. Оваа вежба ќе ви помогне да ги опуштите мускулите на листовите.
Седнете и испружете ја едната нога напред. Другото стапало ставете го под испруженото колено. Испружете ја напред раката спротивна на ногата и обидете се да го фатите палецот на ногата. Седете исправено и држете 30 секунди. Потоа повторете на другата страна.
5. Истегнување на страничниот дел од телото
Ова истегнување изгледа едноставно, но прави многу за вашето тело – ги истегнува грбот, вратот и тетивите.
Испружете ја едната нога на страна а другата свиткајте ја. Странично наведнете се кон испружената нога и држете ги рамената спуштени. Држете ја положбата 30 секунди и повторете од другата страна.
Пробајте ги и овие лесни јога вежби за истегнување на целото тело.
