Претходно
Слабеење со одење: 7 закони за намалување на килограмите без теретана
Одењето е секојдневна навика чии придобивки поголемиот дел од нас не ги искористуваат максимално. Со други зборови, одењето може да биде единствената физичка активност која е потребна за да ослабете, секако со контролирано дневно внесување на калории.
„Одењето е широко достапен и едноставен начин за да ги изгубите килограмите, особено ако вашиот стил на живот ве држи ‘заробени’ за столицата или во автомобилот“, вели личниот тренер Хана Дејвис.
Освен што помага при согорувањето на калориите, одењето е одличен начин за намалување на стресот. А, со помалку стрес полесно слабееме. Во продолжение прочитајте до кои 7 закони мора да се придржувате доколку сакате да слабеете со секој направен чекор…
1. Достигнете 15.000 чекори дневно
Личниот тренер Хана Дејвис препорачува да правите по 15.000 чекори секојдневно. Можеби ви изгледа како преголема бројка, но во неа влегува секој чекор што ќе го направите од моментот кога ќе станете од кревет, до повторното легнување вечерта.
„Не грижете се ако веднаш не го достигнувате овој број. Важно е само да почнете“, советува Дејвис. „За разлика од тоа кога преку ноќ ќе го зголемите интензитетот на вежбањето, дуплирањето на бројот на чекори преку ноќ нема да го оптовари телото ниту да ја зголеми можноста за повреди.“
2. Пешачете 3 пати дневно по 20 минути
Доколку секој ден пешачите 3 пати по 20 минути, тоа ќе ви помогне да ја достигнете посакуваната бројка на чекори и да ослабете. Истражувањето од Универзитетот Џорџ Вашингтон заклучило дека луѓето кои оделе по 15 минути после секој оброк имале подобра рамнотежа на шеќер во крвта (што може да ја намали желбата за уште повеќе храна откако веќе сте јаделе) од оние кои чекореле по 45 континуирани минути во која било доба од денот. Тоа значи дека одењето после ручекот може да ве спаси од вообичаената попладневна дремка после јадењето и желбата за десерти.
3. Одете по нагорнини 3 пати неделно
Одењето по нагорнини, што вклучува и одење по скали, помага при зацврстувањето на мускулите, што пак го забрзува метаболизмот. На тој начин ќе согорите повеќе калории дури и кога седите покрај работната маса. Започнете така што на неделната рутина ќе ѝ додавате интервали со одење по нагорнини, кои потоа постепено ќе ги зголемувате.
4. Правете интервали со брзо одење
Почнете да правите и едноминутни интервали во кои ќе го забрзувате ритамот на одењето и така ќе го зголемите бројот на отчукувања на срцето, односно ќе согорите повеќе калории. Откако ќе го совладате едноминутниот интервал во вашата рутина на одење, постепено започнете да го зголемувате ритамот и траењето на интервалот. Додека чекорите побрзо, мрдајте со рацете. Движењето на рацете ќе ви помогне да согорите повеќе калории, но и да ги зајакнете рамената и пределот на стомакот.
5. Додавајте вежби на секојдневното пешачење
Слабеењето со чекорење не подразбира само чекорење. Правете паузи во кои ќе направите и 15 до 20 чучнувања, склекови потпирајќи се на клупа или длабоки расчекорувања.
6. Не надминувајте 1.600 калории во текот на денот
Колку хранливи состојки во текот на денот мора да внесете зависи од многу фактори, но поголемиот дел од жените кои слабеат со одење се држат до исхрана од 1.200 до 1.600 калории дневно, богата со белковини.
„Ако сакате да ослабете со помош на одење со низок интензитет, морате строго да внимавате на исхраната за да ги изгубите килограмите. Иако ја зголемувате телесната активност, морате да го намалите и внесувањето на калориите“, истакнува Дејвис.
7. Одбирајте го подолгиот пат
Со воведување поголем број чекори во вашите секојдневни активности (паркирање подалеку од работното место или домот, користење скали наместо лифт и слично) ќе си го олесните достигнувањето на бројката од 15.000 чекори дневно, но и ќе го забрзате слабеењето.
Погледнете колку треба да пешачите за да почнете да слабеете.
