Претходно
Секојдневни навики кои прават да се чувствувате заглавено во сопствениот живот
Дали некогаш сте имале моменти кога сте се чувствувале заробени и кога не сте знаеле што да правите? За жал, повеќето луѓето се имаат најдено во ваква ситуација, понекогаш дури не се ни свесни за тоа, а главниот виновник најчесто треба да се бара во секојдневните навики. Верувале или не, вашите мисли се ваши навики. И покрај тоа што се чини дека доаѓаат автоматски, вие имате контрола над она што го мислите.
Првиот чекор за менување на вашите мисли е да утврдите што сакате, а потоа да ги забележите мислите кои ви доаѓаат и колку тие се поразлични од постигнувањето на вашите цели. Така, вие ќе можете да го промените своето размислување и да бидете поблиску до остварување на она што би сакале да го видите во својот живот. Ако верувате во себе и си замислите подобра иднина, вие ќе можете да излезете од секојдневието каде што сте заробени. Важно е само да бидете одговорни и да се потрудите да промените некои од следниве дневни навики.
1. Си поставувате премногу обврски
Кога луѓето се преоптоварени со обврски, тие може лесно да се откажат или да ги остават работите недовршени. Така, ги опседнуваат негативни мисли кои пак може да доведат до анксиозност, затоа што самите одлучуваат да не работат на задачите сѐ додека не бидат целосно подготвени за тоа. Затоа, обидете се да си поставите само две до три поважни и поголеми обврски, а покрај нив и неколку помали. Така ќе бидете сигурни дека секојдневно ќе можете да ги завршите своите задолженија.
2. Не управувате со целите во мали чекори
Исто така од голема помош може да ви биде и тоа кога ќе создавате и ќе управувате со вашите цели во помали чекори. Така ќе постигнете повеќе нешта: Ќе имате напредок кој ја зголемува мотивацијата и самодовербата. На овој начин почесто ќе ги остварувате вашите поставени мали цели и редовно ќе го прославувате вашиот успех. Ако практикувате мали чекори, вие почесто ќе ставате точка на некоја работа и постојано ќе започнувате повторно, со чисти и јасни работи. На пример, можете и да пишувате дневник, со што ќе бидете поорганизирани и ќе знаете точно на што да се фокусирате.
3. Не преземате ризици
Доколку се плашите да преземате ризик затоа што не сте сигурни за она што може да следува, тоа може да ви биде пречка за вашиот раст и учење. Да, можете да ја избегнете можноста за неуспех, но нема да знаете кон што тежнеете во животот и за што сте предодредени доколку не пробате нешто ново. Ако не преземате ризици, тогаш со сигурност нема да имате и големи достигнувања во вашиот живот. Ако бидете похрабри, вие ќе согледате што е добро а што не, па потоа ќе можете да бидете повешти во вашите наредни избори.
4. Не учите нови вештини
Зошто да се откажете од успехот кога тој може да биде ваш? Погледнете на учењето нови работи како на нешто забавно и начин да запознаете нови луѓе и пријатели, а исто така и да стекнете повеќе доверба во себе. Само затоа што веќе не одите во училиште, не значи дека треба да престанете да учите. Без разлика дали сакате унапредување во вашата кариера, да започнете сопствен бизнис или нешто друго, учењето нови вештини може да ви помогне повторно и подлабоко да се заљубите во животот.
5. Се фокусирате на бесмислени задачи
Ако сакате да се ослободите од чувството на заглавеност во вашиот сопствен живот, обидете се да се фокусирате на она што е најважно. Не трошете го своето драгоцено време на бесмислени работи. Правете го она што е важно и она што ќе ви помогне да ги остварите вашите цели.
6. Не се грижите за себе
Како да излезете кога сте заглавени во секојдневието, ако на прво место не сте поставите себеси? Престанете да се ставате на последно место, затоа што така може да ви се намали енергијата и нема да имате издржливост да го остварите она што го сакате. Ако не си пружите соодветна грижа и нега, тогаш тоа ќе доведе до ментална исцрпеност и депресија. Можете подобро да им помогнете и на другите кога на површина ќе го извадите најдоброто од себе.
7. Премногу сте вклучени во социјалните мрежи
Ако им дозволите да ве опседнат, а не да ви служат како мотивација за развивање и унапредување, тогаш социјалните мрежи ќе ве спречат да ги остварите вашите соништа. Не треба да ве изненадува сознанието дека тие ве држат заглавени. Повеќето луѓе го трошат своето време на Фејсбук, Инстаграм или Твитер, затоа што не знаат што друго да прават. Проблемот е тоа што социјалните мрежи, без да бидете свесни, може да ви одземат повеќе време, а тоа е целосно бескорисно. Доколку постојано следите што објавуваат вашите пријатели и го гледате нивниот возбудлив живот, вие потсвесно можете да се споредувате и да се фокусирате на нешто што не е ваша работа. Пронајдете активности кои се продуктивни и кои ќе ви овозможат брз развој и напредок.
8. Се фокусирате на чувството на заглавеност
Ако се фокусирате на тоа што сте заглавени – нема да почувствувате ништо друго, туку само дека се наоѓате во некоја стапица. За да ги промените работите, морате да го принудите вашиот ум да се фокусира на нови нешта, нови искуства, идеи и можности. Купете жанр на книга каков што никогаш не сте читале. Поставете си цел да запознаете барем една нова личност во месецот. Кога ќе правите нешто вакво, вие ќе почнете да се фокусирате на многу други поважни работи, а ќе имате и повеќе контрола над вашите мисли и постапки. Патот можеби нема да биде лесен, но потребна е голема упорност за да се искачи планината. Сѐ додека не се откажувате, ќе се чувствувате подобро.
9. Ги спречувате вашите односи да растат
Можете да се чувствувате заглавени во животот и затоа што вашите односи не ги продлабочувате и не ги унапредувате. Не дозволувајте вашите врски да се сведуваат само на виртуелната комуникација. Излезете надвор, научете да го читате говорот на телото и споделувајте различни моменти и искуства со вашите пријатели и сакани. Вложете малку труд, напор и време, нема да зажалите за тоа. Додека вашата напорна работа може да ви ја унапреди кариерата, вашите врски може да ви го пополнат животот со љубов. Добрата поддршка е од суштинско значење за да се чувствувате слободни, затоа што кога имате некој до вас да ви биде потпора, тогаш ќе чувствувате дека сѐ е возможно.
Не е реткост некоја личност да се чувствува заглавено во својот живот. Но, она што ќе одлучите да ви се случи овој период, ќе влијае на вашиот понатамошен успех, раст и развој. Што и да правите, не задржувајте се на минатото и уживајте онаму каде што сте. Колку подобро и побрзо ќе го сфатите ова, толку поблагодарни ќе се чувствувате.
