Претходно
Најпопуларната вежба за сила и издржливост: Како правилно се прави бурпи?
Бурпи не е лесна вежба и не е ни чудо што многумина всушност ја мразат. По одреден број повторувања на оваа вежба, многу луѓе се заморуваат и се чувствуваат како да им горат белите дробови. Сепак, ова е една од најпопуларните вежби во различни програми за вежбање и затоа е важно да знаете како правилно се прави бурпи.
Фитнес-тренерите велат дека оваа сложена и макотрпна вежба е одлична за развој на сила и издржливост. Но, таа е исто така одличен избор за согорување калории. Иако постојат и други начини да се постигне овој ефект, бурпи е популарна затоа што се прави брзо и лесно. Не ви треба дополнителна опрема за да го зголемите интензитетот на тренингот и можете да ја изведувате во секое време и на кое било место. Како правилно се прави бурпи, чекор по чекор?
Чекор 1
Свиткајте ги колената како да правите клекни-стани и ставете ги дланките на подот рамно со рамената. Повлечете ги нозете назад за да се истегнете. Не удирајте ја земјата со вашите раце при „слетувањето“, туку обидете се да го направите тоа колку што е можно понежно. „Слетувањето“ со силен удар на дланките на подот може да ги истегне зглобовите, лактите и рамената.
Чекор 2
Стегнете го глутеусот и држете го вратот во неутрална положба додека го спуштате телото на подот. По неколку повторувања, кога ќе почнете да се заморувате, можеби ќе почнете да ги спуштате колковите на земја пред остатокот од вашето тело. Ова може да го оптовари долниот дел на грбот, па обидете се да го одржувате целото тело во права линија додека се движите кон подот.
Чекор 3
Држете го вашето тело исправено. Избегнувајте прво да ги кренете градите, оставајќи ги колковите на подот. Ова создава преголем лак во долниот дел на грбот што може да доведе до повреди и болки во грбот. Скокнете напред во сквот, со нозете раширени малку повеќе од ширината на колкот. Од таа позиција, скокнете високо, со рацете кренати кон таванот. Малку свиткајте ги колената кога ќе застанете за да ги заштитите колената и зглобовите.
Што друго треба да знаете за бурпи?
Оваа вежба не е за секого. Ако имате какви било повреди, подобро да ја избегнувате. Бурпи е движење со голем удар, што значи дека ризикот од повреда е поголем отколку кај другите вежби – особено кога сте уморни. Исто така, ако некогаш сте имале повреда на зглобот или имате слаби зглобови, треба да ја избегнувате оваа вежба. Фитнес-тренерите обично ги оставаат бурпите за крај, како брза вежба со висок интензитет на крајот од тренингот или ја изведуваат како низа движења од минута во минута. Овие два вида тренинг имаат нешто заедничко: тие обично се кратки. Тоа е голем плус затоа што бурпи не е вежба што би ја правеле 40 минути континуирано.
Дали оваа вежба може да биде опасна?
Повредите најчесто се случуваат во тој дел од вежбата кога луѓето ќе ги стават зглобовите на подот. Или, се јавува болка во грбот поради премногу лак на грбот. Затоа, потребно е да се обрне внимание на движењата. Бурпи не е вежба за почетници. Постои висок ризик од повреда и затоа некои тренери ја избегнуваат. Тоа не значи дека никогаш не треба да правите бурпи ако ви се допаѓаат, но не претерувајте.
Прочитајте како да го издржите интензивното темпо додека вежбате.
