Претходно
Најчестите сексуално преносливи болести со кои можете да се заразите дури и ако користите презерватив
Главната задача на презервативот е да го спречи навлегувањето на семената течност со што покрај несаканата бременост се спречува и пренесувањето на голем број полови болести како што се хепатитис Б, хепатитис Ц, гонореја, кламидија и ХИВ. Тоа е така затоа што латексот од кој е направен кондомот делува како непробојна бариера и не ги пропушта патогените честички на полово преносливите болести. Но, проблемот е во тоа што некои болести не се пренесуваат преку семената течност, што значи дека презервативот можеби нема да биде доволна заштита.
Имено, кога станува збор за болести што се пренесуваат преку кожа, презервативот нема да делува. Токму поради тоа, доколку сте сексуално активни, многу е важно редовно да се тестирате дури и ако практикувате безбеден секс. Некои полово преносливи болести имаат сериозни последици на здравјето ако не се лекуваат како што се неплодност и рак. Ова се најчестите болести со кои можете да се заразите дури и тогаш кога користите презерватив…
Генитален херпес
Ако раната од херпесот се наоѓа кај препоните или на дел кој не е покриен со кондом, може да дојде до пренесување на херпесот преку таа незаштитена рана. Лекарите препорачуваат апстиненција кога имате видливо избивање на херпес (тогаш херпесот најлесно се пренесува), но треба да знаете дека херпесот може да се пренесе и тогаш кога нема видливи симптоми.
Презервативот не е доволна заштита ни кај херпесот од тип 2, односно гениталниот херпес, ни кај херпесот од тип 1, односно оралниот херпес за кој неодамна се откри дека може да се пренесе преку полов однос. Во зависност од стадиумот на болеста, херпесот може да биде помалку (кога нема видливи симптоми) или повеќе заразен (кога има видливи меурчиња на кожата). Гениталниот херпес може да предизвика и вагинална болка.
ХПВ
Хуман папилома вирусот е највообичаената сексуално пренослива болест и доколку сте сексуално активни, постои голема веројатност дека некогаш во животот ќе бидете изложени на ризик од ХПВ. Некои типови ХПВ можат да предизвикаат генитални брадавици, но некои немаат никакви видливи надворешни симптоми поради што многу луѓе не знаат дека имаат ХПВ. Дури и тогаш кога не постојат брадавици, ХПВ може да се пренесе преку кожата.
Некои типови ХПВ можат да предизвикаат рак на грлото на матката и иако постојат докази дека користењето презерватив го намалува ризикот од рак на грлото на матката, нема цврсти докази дека кондомот го спречува пренесувањето на ХПВ.
Срамни вошки
Срамните вошки не се толку вообичаени поради подобрувањето на општествените стандарди и хигиенските навики. Срамните вошки положуваат јајца и живеат во срамните влакна што значи дека во таков случај, презервативот нема да биде од никаква помош.
Сифилис
Сифилисот се манифестира како цврста, тркалезна и најчесто безболна рана, односно чир. Како и кај херпесот, презервативот може да пружи заштита во зависност од тоа каде се наоѓа раната. Употребата на кондомот го намалува ризикот од заразување, но ако чирот се наоѓа на дел од пенисот кој не е заштитен, може да се пренесе.
Во продолжение прочитајте ги овие 4 начини на кои можете да закачите сексуално-преносливи болести дури и ако не сте имале секс.
