Претходно
Начинот на кој го поминувате часот по работното време е тоа што го одредува вашиот успех
На крајот од денот, откако сте работеле долго и напорно, чувствувате дека ви е исцрпена целата енергија. Така, секојдневно набрзина и без волја правите нешто за јадење и гледате телевизија, со што сакате да си го одвлечете вниманието од работните обврски. Сето ова звучи ужасно, зар не? Но, вие не сте осудени да ја повторувате секојдневно таа мрзлива рутина. Така, наместо да гледате телевизија или да поминувате време на социјалните мрежи, вие можете да го користите овој период за да правите нешто попродуктивно, со што ќе го подобрите вашиот личен и професионален живот.
Придобивките кои ќе ги имате доколку добро го искористите првиот час по завршувањето на работните обврски
Најпрво, доколку потрошите еден час после работата на нешто што сметате дека е продуктивно, без разлика дали тоа е учење нов јазик или истражување за нешто што ве интересира, вие ќе се чувствувате поисполнети, а со тоа и посреќни. Ова ќе направи значајна разлика во вашата продуктивност, а порано или подоцна, вашиот претпоставен ќе ја забележи разликата.
Потоа, сигурно не можете цело време да учите нешто ново или да практикувате некое хоби за време на работните часови. Така, ќе ви се намали личната корист и нема да бидете продуктивни. По завршувањето на работното време, вие самите сте си свои шефови и самите си одредувате правила и го планирате своето време.
Исто така еден час секој ден посветен на работи кои ве исполнуваат, ќе направи голема разлика на долг рок. На пример, ако учите нов јазик секој ден по еден час, во текот на целата година, вие ќе имате задоволителни резултати. Треба да се има предвид дека компаниите може да ве вработат или да ве унапредат врз основа на она што го правите во часовите после работата. Така, доколку изучувате италијански јазик, тоа може да ви биде од корист кога ќе се сретнете со компанија која има потреба од таков вработен.
Со кои проблеми може да се соочите доколку не правите ништо корисно?
На овој начин вие сте во мирување, а со таков став не можете да очекувате да се промени вашиот живот. Тоа значи дека нема да напредувате, нема да ги остварите своите цели и нема да имате посветла иднина. Ако имате какви било цели, не дозволувајте да бидете вовлечени во неактивната дневна рутина.
Вториот проблем кој може да ви се појави доколку секојдневно сте мрзливи, е што тоа може да влијае на вашата психичка состојба, а во некои случаи може дури да води и во депресија. Депресијата сама по себе е значаен проблем, но исто така води и кон намалување на работната продуктивност, а како резултат на тоа ќе се влошат условите за работа и општиот статус. Па, излегува дека посветеноста на нешто продуктивно само еден час по работата, може да направи голема разлика во светот!
Неколку начини кои ќе ви покажат како корисно да го искористите времето после работа
1. Читајте што било, без разлика дали е тоа романтичен роман, научна фантастика или психолошки трилер. Со еден час читање, секој ден, во текот на една недела ќе завршувате по една книга, а колку повеќе читате, толку повеќе ќе знаете. Исто така со читањето вие го збогатувате вашиот речник, а ќе се соочите и со многу интересни теми кои ќе ви бидат поттик за истражување.
2. Започнете со некои лични проекти. Ова е особено корисно доколку работното место не ви овозможува да бидете доволно креативни. Одредени активности, како што е на пример волонтирањето, ќе ви дадат многу лични вредности, како што е разбирањето на тимската работа, учење како да се почитуваат крајните рокови и како да се справите со повратните информации. Многу одлики кои ќе ви послужат за понатамошна успешна кариера.
3. Запознавајте луѓе. Добро познато е дека врските со другите луѓе се потребни во кој било дел од животот. Сѐ што треба е да излезете и да се дружите! Можете дури и да испланирате средба со вашите соработници.
Ова е само мал пример за она што можете да го извлечете од себеси. Размислете и следете ги своите страсти!
