Претходно
Како најдобро да ги искористите зачините што ги имате дома?
Повеќето зачини стојат некаде скриени во кујната, додека најчесто користите само 2 до 3 зачини. Позната готвачка открива дека повеќето зачини немаат рок на траење и со нив можете да им дадете сосема нов вкус на вашите омилени јадења. Но, постојат неколку зачини со кои треба да бидете внимателни бидејќи тие можат целосно да го засенат вкусот на оброкот. Во продолжение прочитајте како најдобро да ги искористите зачините што ги имате дома.
Чилито е одлично за пржени јајца, рижото и чорби
Чили пиперките помагаат во разградувањето на маснотиите и го намалуваат апетитот. Чилито е универзален зачин кој можете да го додадете речиси во секое јадење, како што се супи, чорби, пржени јајца, сосови, рижото и тестенини. Најдобро се комбинира со ѓумбир, со чоколадо, со грав и со говедско месо.
Куркумата е идеална за сосови и за маринади
Куркумата е богат извор на различни хранливи материи и има малку калории – две лажички куркума содржат само 16 калории. Овој зачин е одличен за употреба при подготовка на сосови и маринади, како и за зачинување на рижотото. Додајте го во јадењето пред крајот на готвењето. Куркумата се комбинира со лук, лимон, кари, коријандер и ким.
Ѓумбирот оди во супи
Ѓумбирот е извор на магнезиум, витамин Б6, калиум, манган и бакар. Најдобро е да се консумира свеж, рендан ѓумбир како гарнир во супа и во разни маринади, како пијалак или како чај. Додајте свеж ѓумбир на крајот на готвењето, а ако користите сув ѓумбир, додајте го на почетокот за да се ослободи вкусот. Најдобро се комбинира со сос од соја, лимон, чили и лук.
Рузмаринот го подобрува вкусот на месото
Тој е извор на фитонутриенти како што се росманолот и рузмаринската киселина, кои помагаат во отстранувањето на слободните радикали. Свежиот рузмарин може да го додадете во омлетот, за зачинување на јагнешкото и пилешкото месо и во разни сосови и супи од домати. Ако користите сув рузмарин, додајте го на почетокот на готвењето, така што ќе се загрее и ќе го ослободи својот вкус.
Цимет за слатки јадења
Додајте го циметот во слатки јадења – во колачи, во овесна каша или во пијалаци. Ако се готви премногу долго, ги губи вкусот и аромата, па затоа додајте го на крајот. Циметот содржи фитонутриенти кои го спречуваат згрутчувањето на крвта, го штитат кардиоваскуларниот систем и помагаат во регулирањето на шеќерот во крвта.
Босилекот може да се стави во сè
Босилекот содржи моќни антиоксидантни флавоноиди и има антивоспалителни и антибиотички својства. За да зачувате колку што е можно повеќе хранливи материи, најдобро е да го додадете пред крајот на готвењето, но може да се додаде и по готвењето. Ако ви се допаѓа неговиот вкус, можете да го додадете во сите солени јадења.
Магдоносот најдобро се комбинира со лук
Магдоносот е концентриран извор на оксалат, железо, калциум, магнезиум и диетални влакна. Најдобро се комбинира со лимон, нане, лук, риба и говедско месо.
Копарот е одличен за сосови
Копарот е богат со фитонутриенти и антиоксиданти. Тој е одличен додаток во подготовката на разни сосови, но можете да го додадете и во салати и во јадења со риби.
Коријандер со мешункасти плодови
Поради високата содржина на флавоноиди, коријандерот има антивоспалителни својства. Можете да го комбинирате со пилешко месо и мешункасти плодови или како додаток во преливи и сосови.
Пиперот се додава на крајот
Пиперот им дава посебен вкус на јадењата, особено на месото, на јајцата и на печурките. Најдобро е да додадете свежо мелен пипер, непосредно пред да го сервирате јадењето. Пиперот можете да го додадете и во намази, маринади и преливи за салата.
Погледнете ги најдобрите трикови за пржени јајца и како да го претворите едноставниот оброк во вкусен специјалитет.
