Претходно
Како да пронајдете идеално хоби за себе?
Изгледа дека во денешно време, кога сите информации преку интернетот ни се на дофат на рака, пронаоѓањето хоби би требало да биде едноставна задача. И во теорија е, но во пракса многу луѓе по краток период се откажуваат од своето хоби. Тие трошат многу финансиски средства, драгоцено време, но брзо креваат раце, па наместо уште едно искуство повеќе, им останува горчлив вкус во устата.
Иако ниту едно хоби не треба да трае за цел живот, бидејќи животните околности и интереси се менуваат низ животот, сепак треба да се извлече нешто позитивно од него, а за тоа да се стори, потребно е одредено време. Па, доколку сте во фаза на размислување и пронаоѓање идеално хоби, советите подолу ќе ви бидат од голема помош. Пронаоѓањето ново хоби можете да го гледате како едно работно претпријатие што може да го промени вашиот живот на подобро и да ви донесе, пред сѐ, задоволство и немерливо душевно богатство.
1. Поместете ги границите
Која е првата работа која ви паѓа на памет кога ќе помислите на ново хоби? Сигурно: „Не, тоа не е за мене!“ Не можете да започнете да се занимавате со падобранство, бидејќи се плашите од висини или не сте заинтересирани за сликарство, бидејќи не знаете да цртате. Можеби некогаш ќе помислите: „Да, тоа е совршено хоби за мене, но…!“ Градинарството е одлично хоби за вас, но го немате потребното парче градина.
Во првиот случај, потребно е да се ослободите од стравовите. Иако тоа не е едноставно, запрашајте се кој е најдобриот начин да се ослободите од тие стравови. Ако не бидете успешни до крајот, барем ќе знаете дека сте се обиделе и до каде се вашите граници. Како второ, треба да се запрашате дали сте реални кога е во прашање хобито. Не можете да се занимавате со градинарство доколку немате градина, како што не можете да скокате од авион без падобран. Значи, важно е да ги поместувате границите, но исто така и да бидете реални.
2. Какво хоби сакате?
Како и во која било друга работна одлука, кога размислувате за хобито, размислете дали сакате тоа да биде нешто со кое ќе се занимавате сами, без присуство на други личности или пак тоа ќе биде социјална активност која зближува различни луѓе со ист интерес. Секако, доколку сакате да ги проширите вашите видици и да запознаете нови луѓе, тогаш треба да изберете хоби кое воедно е и социјална активност. Исто е и во работното претпријатие, треба да размислите дали сакате да работите сами или да имате партнери.
3. Размислете за финансиите
Секој знае дека желбите се едно, а можностите друго. Хобито мора да одговара на вашите финансиски можности. На пример, ако сакате да се занимавате со сликарство, тогаш мора да купите прибор за сликање, бои, да имате дополнителен простор каде што ќе сликате. Сето тоа бара одредени финансиски средства. За жал, ништо не е бесплатно. Подеднакво е и во кое било друго работно претпријатие. Треба да бидете реални и внимателни со вложувањата.
4. Искористете ги пријателите
Кога е во прашање новото хоби за кое размислувате, освен на Интернет, многу вистински информации можете да дознаете и од вашите пријатели, познаници и колеги. Затоа, пред да се впуштите во собирање поштенски марки, секако распрашајте се што е тоа што ги прави вредни. Можеби одредено хоби на крајот нема да биде толку добро за вас, или пак обратно. Освен тоа, пријателите или познаниците може да бидат оние кои ќе ви помогнат во започнувањето на хобито, од запознавањето на вистинските луѓе, па сè до заемот на опрема, алат и давање на почетно знаење. Исто е и во започнувањето на работно претпријатие, искористете ја помошта која ви се нуди, познанствата и корисните совети.
5. Хоби = задоволство
Како што кажавме уште на почетокот, не треба секое хоби со кое ќе започнете да се занимавате да биде она вистинското, ниту пак треба да се занимавате со него засекогаш. Исто како работата. Но за разлика од неа, хобито во одреден дел од животот треба да ве забавува, опушта, усреќува…
