Претходно
5 одлични рецепти за вашата новогодишна трпеза
Доколку сте одлучиле Новата година да ја дочекате во удобноста на вашиот дом, сигурно ќе ви се допаднат овие предлози за вашата новогодишна трпеза.
1. Кифлички со сирење
Потребни состојки:
- 1 килограм брашно
- Масло
- 500 милилитри млеко
- 3 јајца
- 1 и пол коцка квасец
- Сирење
Начин на подготовка:
- За филот измешајте 200 грама сирење со 1 јајце. Додајте сол по вкус.
- Во малку топло млеко ставете квасец, сол и шеќер. Промешајте за брзо да се растопи квасецот. По 5 минути почнете да го подготвувате тестото.
- Во сад ставете брашно, направете дупка во средината, ставете ги 3-те јајца, па полека налевајте млеко и почнете со мешање. Можете да почнете со лажица, а кога ќе се соедини смесата продолжете со рака. Направете меко тесто и оставете го да порасне.
- Поделете го тестото на 6 делови. Од секој дел направете 8 кифлички. Филувајте ја секоја со сирење и наредете ги на подмачкана тава. Оставете ги стојат 1 и пол час.
- Пред печењето, на секоја кифличка ставете парче маргарин, премачкајте ги со жолчка и ставете малку сусам.
- Ставете ги да се печат во рерна загреана на 200 степени. По неколку минути намалете ја температурата на 180 степени.
2. Салата мимоза
Потребни состојки:
- 4 средни компири
- 400-500 грама моркови
- 6-7 кисели краставички
- 6 јајца
- 1 главица виолетов кромид
- 200 грама кашкавал
- 300 грама салама по избор
- 300 грама мајонез
- 100 грама кисела павлака
- 1 лажичка сол
- Бибер
- Свеж магдонос
Начин на подготовка:
- Сварете го компирот, а морковите излупете ги и сварете ги одделно. Сварете ги и јајцата и оставете ги да се изладат со зеленчукот.
- Измешајте ги мајонезот и павлаката и додајте сол и бибер.
- Изрендајте ги сите состојки (освен лукот). Одделете ги белките од жолчките.
- На дното ставете го исечканиот магдонос, изрендајте компир и ставете тенок слој од намазот.
- Потоа ставете морков, намаз, салама, намаз, кашкавал, намаз, лук, намаз, рендана белка, намаз, кисели краставички, намаз, и на крај додајте ја ренданата жолчка. Украсете по желба.
3. Полнети ролнички со сланина
Потребни состојки:
- 1 пар пилешки гради
- 200-250 грама сува сланина
- 100-150 грама кулен
- 150 грама фета сирење
- Зачин, сол и бибер
- Лук
- Кари
Начин на подготовка:
- Исечете го месото на тенки шницли, додајте зачини, сол, бибер и кари и добро измешајте.
- Издробете го сирењето, додајте го издробениот бел лук и исечканиот кулен и добро измешајте.
- Ставете едно парче сланина, а врз него парче месо. На месото ставете од филот со сирење. Завиткајте го заедно со сланината и направете ролничка.
- Наредете ги ролничките во сад со фолија. Можете да додадете и компир да се пече како прилог.
- Печете 40 минути во рерна загреана на 200 степени.
4. Салата со зелка и кисело млеко
Потребни состојки:
- 2 помали зелки
- 1 кромид
- 1 лажичка шеќер
- 1/2 лажичка сол
- Бибер
- 120 милилитри млеко
- 4 лажици мајонез
- 230 милилитри матеница
- 1 лажица оцет
- Малку лимонов сок
- 1 морков
Начин на подготовка:
- Исечкајте ја зелката и измешајте ја со кромидот и изренданиот морков.
- Во друга чинија ставете шеќер, сол, бибер, млеко, мајонез, оцет и матеница. Мешајте додека не се соединат состојките.
- Измешајте го преливот со зелката и оставете да отстои околу 1 час.
4. Куглоф со малини и чоколадо
Потребни состојки:
- 5 јајца
- 250 грама шеќер
- 250 грама маргарин
- 100 грама чоколадо
- 200 милилитри јогурт
- 1 ванилин шеќер
- 350 грама брашно
- 300 грама малини (или вишни)
Начин на подготовка:
- За преливот растопете 100 грама чоколадо со една лажица масло.
- Растопете 100 грама чоколадо, калапот премачкајте го со масло и брашно и загрејте ја рерната на 180 степени.
- Изматете ги маргаринот, шеќерот и ванилиниот шеќер, додајте ги јајцата, јогуртот и брашното.
- Во калапот ставете поголем дел од тестото, додајте ги малините, па додајте уште малку од смесата.
- Во остатокот смеса измешајте го растопеното чоколадо и ставете го во садот. Со нож прободете низ тестото.
- Печете околу еден час, па оставете го да се излади. Извадете го колачот од калапот и прелијте го со растопено чоколадо.
Погледнете го и овој одличен предлог за декорација на вашата новогодишна трпеза.
