Претходно
5 кратки совети за успешен работен ден
Датум: 10 јан 2012
Коментари: 0
Тагови: будење, весници, вести, имејл, колеги, комуникација, обврски, порака, пријател, продуктивност, работа, рано, соработници
Автор: Весна Јовановска
Само мали измени во секојдневната работна рутина, може да ве направат попродуктивни и да постигнете многу подобри резултати. Ви нудиме пет куси и едноставни совети, кои ќе ви помогнат да внесете свежина во вашата работна средина, да ги подобрите односите со колегите или да ги обновите контактите со подзаборавените пријатели и соработници.
1. Разбудете се порано
Започнете да се будите барем половина час порано од вообичаено. Колку повеќе обврски ве чекаат, толку порано нека ви ѕвони алармот. Најдобро време да ги завршите обврските е токму утрото, пред да започне да се полни вашата електронска пошта со пораки и нови задачи од колегите и соработниците. Со новиот почеток на денот, ќе избегнете натрупување на обврските, а со тоа ќе им ставите крај и на главоболките.
2. Читајте весници и гледајте вести
Ако го практикувате ова, вие ќе бидете чекор пред останатите. Не само што ќе знаете што се случува во светот, туку и полесно ќе ги препознаете, односно откриете новите можности за ваш личен напредок или напредок на вашиот бизнис. Ќе имате јасна претстава и планови за денот, уште пред вашите конкуренти да го испијат првото утринско кафе.
3. Испратете по некој неформален имејл
Во знак на внимание, испратете ù нешто на личноста која ја гледате како ваш иден работодавач или на вашите потенцијални купувачи. На пример, пуштете им по еден кус имејл кој ќе содржи некој корисен линк или едноставно поздравете ги и прашајте ги како се.
4. Стапете во контакт со некој стар пријател или соработник
Пробајте да искомуницирате со некој стар пријател или поранешен соработник. Одберете некој што не сте го виделе со години и пријатно изненадете го. Прашајте го како е, што работи во моментот, дали и како можете да му помогнете или пак, вие сугерирајте му помош. Верувајте, ќе му го разубавите денот.
5. Испратете рачно напишана порака
Заблагодарете се на стариот добар начин. Испратете рачно напишана белешка до колегите или соработниците. Сериозно. Тоа е изгубена навика, но ве уверуваме дека впечатокот ќе биде оригинален. Сигурно постои некој кому сè уште не сте му кажале благодарам. Ова е вистинскиот начин да го сторите тоа.
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
