Претходно
4 огромни придобивки од престојот во странска земја
За некои напуштањето на огништето и заминувањето во странска земја претставува скршнување од добро зацртаната патека на живеење, непотребен стрес и измачување. Всушност, наспроти традиционалните верувања, предноста која ќе ја стекнете со ваквото искуство е огромна. Животот во странска земја ќе ве направи похрабри, поиздржливи и несомнено ќе ве збогати со следниве непроценливи вештини, клучни за вашиот иден личен и професионален развој.
1. Управување со време и пари
Кога сте оставени сами на себе, мора да се однесувате одговорно кон финансиите кои ви се на располагање. Во такви околности ќе научите кога треба да заштедите, а кога можете малку повеќе да потрошите. Различни земји носат различен степен на одговорност, но каде и да одите, вештините на управување со парите и времето се особено важни за преживување. По такво искуство сигурно ќе ги стекнете, а ќе ве направат многу поиздржливи и посилни.
2. Независно размислување
Престојот во странска земја на подолг период бара голем степен на самодоверба и независност. Светот е големо место и многу брзо ќе сфатите дека нема патеки кои се целосно лоши или добри. Ги прифаќате предизвиците и се откривате себеси. Веќе знаете што сакате, верувате во себе, што во иднина несомнено ќе ви помогне полесно и похрабро да донесувате важни одлуки во приватниот и во професионалниот живот.
3. Немање страв од предизвици
Патувањето низ различни земји, запознавањето нови луѓе и култури на живеење, ве прават свесни за сите ваши скриени потенцијали, кои не сте ни мислеле дека ги поседувате. При престојот во странска земја постојано се предизвикувате себеси и пробувате нови нешта. Излегувате од зоната на комфорот и станувате храбри да се соочите со многуте предизвици кои следат.
4. Справување со промени
И за крај, по едно вакво искуство веќе немате страв од промени. Сфаќате дека промената е единствената константа во животот, како во приватниот, така и во професионалниот. Принудени сте да се прилагодите на новата средина, култура и јазик и да излезете од удобната матрица на живеење. Набргу сфаќате дека светот не е она страшно и запустено место, кое што некогаш си го замислувавте и дека луѓето насекаде ги имаат истите борби, надежи и соништа. Преку ваквите искуства нема само да научите кои сте, туку и каде припаѓате во светот. Вештините стекнати при престојувањето во странска земја подоцна стануваат скапоцени и применливи во секој аспект од животот.
Затоа, не размислувајте премногу. Престојувајте одреден период во странска земја, научете нешто повеќе за себеси и најважно од сѐ – излезете од зоната на комфорот!
