Претходно
15 знаци дека го искористувате вашиот потенцијал иако мислите дека не е така
Датум: 20 авг 2014
Коментари: 0
Вашиот потенцијал ве прави да достигнувате големи нешта и да си ги остварувате вашите соништа. На моменти може да почувствуваме дека не го даваме најдоброто од себе, дека можеме повеќе, дека не го искористуваме целосно нашиот потенцијал. Но, сè додека се трудите и вложувате време и внимание работејќи го она што го сакате, вие сте на вистинскиот пат. Вистината е дека никој не може да биде присутен секаде и да успева на секое можно поле во животот, па не се обесхрабрувајте. Ова се 15 знаци кои ќе ви покажат дека го користите вашиот потенцијал иако во моментов мислите дека не е така.
1. Зрачите со позитивност
Во најголем дел од времето имате насмевка на вашето лице. Не е сè совршено но вие знаете дека работите си доаѓаат на свое место и на крај коцките ќе се наредат. Кога размислувате за иднината ја гледате со позитива и очекувате убави работи. Кога имате проблем знаете да дојдете до решение, можеби не веднаш, но свесни сте дека за секој проблем има решение, дури и ако понекогаш треба да почекаме и да бидеме стрпливи.
2. Се фокусирате на решенија и крајни резултати
Свесни сте дека најголем дел од проблемите со кои животот нè тера да се справиме, се решаваат со верба во себеси и позитивен пристап на нештата. Немате навика долго да плачете поради тоа што ве снашло туку се фокусирате на тоа како да го поправите. Размислувате за последиците и свесни сте дека секој потег во животот носи различни последици за кои самите сте одговорни.
3. Ги исполнувате вашите цели
Поставувањето цели е многу корисно. Знаете кон што целите и каде се движите. Со помош на целите вие сте одговорни, фокусирани и мотивирани. Се радувате на секој, и најмал успех, бидејќи знаете дека малите чекори исто така ве водат кон големи нешта. Си поставувате многу цели и се фокусирате на исполнување на истите. Можеби не секогаш нештата ќе одат по планираното, но во најголем дел од случаите можете гордо да се пофалите дека со труд сте го добиле она што сте го сакале.
4. Не ви пречи напорната работа
Напротив, ѝ се радувате бидејќи знаете дека она што е навидум тешко, непознато и што ве плаши е токму она што треба да го направите. Свесни сте за тоа и го прифаќате фактот дека ќе има денови кога излегувате рано од дома а се враќате доцна, ќе има непроспиени ноќи и мамурни утра придружени со галонски количини на испиено кафе, но тоа е само дел од патот до успехот.
5. Ги исполнувате вашите ветувања
Вашиот збор ви значи многу и го сфаќате сериозно, како и оние околу вас. Колку ги исполнувате вашите ветувања зборува многу за вас како личност. Дури и ако станува збор за ветување што сте го направиле кон вашиот помал брат, знаете дека треба да го исполните.
6. Вие сте во постојан процес на учење
Не се плашите да побарате помош и свесни сте дека животот е голема лекција. Секогаш сте отворени за нови познанства и знаења. Доколку чувствувате дека ви е потребно повеќе знаење на одредена тема, ќе се запишете на курс или пак ќе се информирате на кој било друг начин. Верувате дека секогаш и од секого може да научите нешто во животот.
7. Отворени сте за промена
Верувате дека нештата се случуваат со причина и дека некогаш мора да излезете од безбедната зона на комфорот и да ризикувате. Иако промените може да бидат страшни, во суштина се добри. Дури и да не излезе како посакуваното, знаете дека сте побогати за едно искуство повеќе.
8. Добро се справувате со стрес
Иако не секогаш ви успева добро и разумно да се справите со стресот, знаете колку е важно како вие реагирате на стрес. Затоа се осврнувате кон нештата кои ве смируваат и знаете дека некогаш е подобро да ја преспиете вечерта и наутро да донесете одлука што ќе правите. Вашиот лек при стресни ситуации може да биде осврнувањето кон религијата, долгите прошетки, слушањето музика и сл.
9. Се грижите за вашата исхрана
Знаете колку е важна здравата исхрана и физичката активност. Се грижите за себе за што телото ви возвраќа со енергија, баланс и добро здравје.
10. Останувате во форма
Не вежбате само за да го отстраните вишокот килограми. Вежбате за едноставно да останете во форма. Тоа е дел од вашиот здрав начин на живот и покажува колку сте истрајни, мотивирани и доследни до своите принципи.
11. Посветувате внимание на физичкиот изглед
Знаете дека физичкиот изглед не е пресуден, но исто така знаете дека е важен. Сакате да зрачите со професионалност и токму поради тоа нема да направите утка при изборот на гардероба за интервју за работа.
12. Негувате цврсти врски со блиските
Врските со членовите на вашето семејство, пријателите или со вашиот партнер ви се важни и вложувате во нив. Знаете дека успешниот човек секогаш негува цврсти пријателства, здрави семејни односи и љубовни врски. Подарувањето љубов значи и добивање љубов, а ако човек не знае каде припаѓа лесно може да се изгуби.
13. Едноставно, се забавувате
Имате полн распоред. Не безделничите и точно знаете што ќе правите утре. Но, исто знаете и како да го организирате слободното време. Само работа и сериозност ќе ве направи здодевни личности кои заборавиле како да уживаат во животот, затоа знаете како да се опуштите и да го доживеете животот како голема забавна авантура.
14. Благодарни сте и скромни
Искрено сте благодарни за малите нешта со кои секојдневно сте благословени. Не се поставувате надмено и во принцип сте скромни и едноставни личности кои знаат да го ценат и вреднуваат животот.
15. Имате животно мото
Или, уште подобро, повеќе од едно. Секогаш се водите по некоја движечка сила која ве мотивира и инспирира. Не само мото, тоа може да биде и нечија животна приказна. Секогаш наоѓате зборови кои ви го поттикнуваат расположението и ве охрабруваат кога ќе се почувствувате несигурно.
Сигурно по читањето на овој текст сфативте колку вложувате во остварувањето на вашите цели во животот и оваа доза на самодоверба ви беше потребна. А, доколку мислите дека некои од горенаведените работи не ги применувате, сега е вистинско време да почнете.
