Претходно
За животот, егото и музиката: 10 незаборавни цитати од Принц
Легендарната музичка поп икона Принц вчера трагично го загуби својот живот на 57-годишна возраст. Несомнено, во наредните неколку денови неговата брилијантност, дело и музичко наследство ќе бидат прославени не само од неговите верни фанови, туку од сите љубители на музиката ширум светот. Покрај неговиот талент, Принц бил интелигентен и интуитивен човек кој низ своите интервјуа и песни не штедел на зборовите и ја споделувал својата мудрост со сите. Во продолжение прочитајте дел од неговите најпознати цитати преку кои без сомнение уште долго ќе го помните.
„Филмовите се вистински. Музиката е вистинска. Тие влијаат врз луѓето. Реални се. Минатата вечер посведочив како еден диџеј успеа да ја контролира целата соба. Дури ни политичарите не го можат тоа.“
„Најважното нешто на светот е да бидете искрени пред самите себеси, но јас исто така ја сакам и опасноста. Тоа е тоа што ѝ недостасува на поп музиката денес. Нема ниту возбуда, ниту мистерија.“
„Клучот на долговечноста е да се научи секој можен аспект на музиката.“
„Она за што луѓето најмногу се грижат денес е да бидат платени, па затоа се обидуваат да прават сѐ што публиката сака да направат. Јас попрво би им го дал на луѓето тоа што им е потребно, наместо тоа што го сакаат.“
„Не сакам да стојам на импровизирана трибуна. Мојот поглед на светот, тоа можете вечно да го дебатирате. Тоа е тоа што го правам. И исто така, јас сум музиката. Дојдете на моето шоу само заради тоа.“
„Сите имаат свое искуство. Затоа сме тука, за да проживуваме искуства, да учиме, да одиме по тие патишта и можеби ќе поминете низ многу од тие патишта и многу ќе научите, па нема да мора да се вратите повторно назад.“
„Имав огромно его кога бев млад. Огромно. Но, тоа и не е толку лошо. Бидејќи на тој начин, барем имате аспирации да станете некој и нешто, се гледате како големи и успешни, бидејќи сакате да бидете големи и успешни.“
„Ниедно дете не е лошо од самиот почеток. Тие само ја имитираат атмосферата околу нив.“
„Кога станав симбол, сите писатели кажуваа шеги, но јас бев тој што се смееше. Знаев дека ќе бидам тука и се чувствував како секој мој нов албум да ми е прв.“
„Да, сите имаме бомби, сите можеме да умреме кој било ден. Но, пред да дозволам тоа да се случи, ќе танцувам низ животот.“
