Претходно
Празникот на чудата – Велигден
Датум: 14 апр 2012
Коментари: 0
Автор: Мандевска Бојана
„Христос воскресна! – Навистина воскресна!“ Тоа е поздравот со кој во наредните денови православните христијани ќе се поздравуваат меѓусебно. Велигден е празник над празниците или празник на чудата. Ден кога се слави Христовото воскресение и победата на доброто над злото.
Главна симболика на овој празник се јајцата. Жените од секое православно семејство утрото на Велики четврток ги фарбаат (вапсуваат) првите јајца во црвена боја, и со нив ги тријат децата по образите или им исцртуваат крст по челата за здравје. Останатите јајца се бојат во различни бои и се цртаат, сината боја ја симболизира непорочноста, виолетовата – крстот, зелената – Христовите ученици, а жолтата – самиот Бог.
Постојат многу митови и легенди за тоа како црвените јајца станале симбол на овој празник. Главен обичај за овој празник е дарувањето велигденски јајца, притоа водејќи сметка секој член на семејството и гостин да добие јајце со одреден симбол.
Момчињата и девојките се даруваат со јајца со исцртано венче за да си најдат животен сопатник, додека пак на малите деца во водата во која се бањаат им се става по едно црвено јајце за да ги заштитува и да ги дарува со здравје. Се верува дека фарбаните јајца имаат голема моќ, па дури и нивната лушпа се смета дека има заштитна функција. Фарабаните јајце се ставаат во кошница со слама со цел таа да наликува на птичјо гнездо.
Ноќта на Велика сабота или во недела наутро се оди во црква на велигденска литургија и тие коишто постеле земаат причеста. Потоа во кругот на семејството се поставува неделен празничен ручек на кој се служи познатата велигденска салата, печен зајак или јагне, се пие црвено вино и се јаде велигденски леб.
Но, пред да се почне со славењето и празнувањето на Велигден, неизбежно е велигденското чистење и кречење на домот. Со чистењето семејствата ги отстрануваат сите непотребни работи кои го спречуваат слободното циркулирање на позитивната енергија во домот и ослободуваат простор за нова подобра енергија која самиот празник ја дава. Украсувањето и средувањето на домот во велигденска атмосфера е прекрасен момент. Нека следните слики бидат инспирација за вас, нека ја разбудат вашата креативност во уредувањето на домот и велигденската трпеза.
Нека ни е вечен и честит празникот!
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
