Претходно
Планина од испечатени фотографии качени на Фликр во 24 часа
Датум: 18 ное 2011
Коментари: 0
Во денешно време, доколку сакате да бидете бомбардирани со фотографии во кои се доловени личните моменти на луѓето, сè што треба да направите е да ги посетите сајтовите за споделување слики и социјални мрежи како Фликр и Фејсбук. Преку ваквите сајтови, веб-порталите за вести и пребарувачите на слики, секојдневно гледаме илјадници фотографии со секаква содржина.
Ваквиот релативно нов културолошки феномен го инспирирал холандскиот визуелен артист Ерик Кеселс да создаде една интересна инсталација. Тој решил да ги преземе сите фотографии кои биле прикачени на Фликр во период од 24 часа, а потоа ги испечатил и ги расфрлал низ соба во уметничката галерија „Foam“ лоцирана во Амстердам, за да ја прикаже масовната количина во еден поинаков, материјален облик. Проектот го нарекол „Photography In Abundance“ (Фотографии во изобилие), а неговата цел била да ја прикаже неизмерната количина фотографии кои се споделуваат на еден сајт, на дневна база.
.
„Во денешно време, секојдневно сме изложени на еден куп фотографии. Изобилството во најголем дел е резултат на сајтовите за споделување фотографии како Фликр, социјалните мрежи како Фејсбук и пребарувачите на слики.
Содржината на фотографиите е мешавина од она што е во ред јавно да се прикаже и она што треба да остане приватно, што доведува и најличните работи отворено и несвесно да ги приложуваме во јавност. Преку печатењето на сите овие фотографии кои се качени во период од 24 часа, го визуелизирам чувството на давење во приказот на туѓите искуства.“
Инаку, досега на Фликр се качени повеќе од 6 милијарди фотографии, а исто толкав број слики се качуваат на Фејсбук на секои два месеци.
По повод 10 години постоење на галеријата „Foam“, организирана е едномесечна прослава, во чиј состав влегуваат артистичките инсталации на разни уметници, меѓу кои и оваа на Кеселс, кои ќе бидат изложени до 7 декември, 2011. Изложбата е насловена „Whats’ next?“ (Што е следно?)
———————————————————————————————————————————————————————
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
