Претходно
Креативни идеи за патувања во зависност од вашата возраст
Патувањата се вбројуваат во најголемите радости во животот. Тие секогаш оставаат сеќавања на кои луѓето со задоволство се навраќаат. Но, еден главен предуслов за убаво поминато патување или одмор, е да ја изберете соодветната дестинација според вашата возраст, како и начинот на кој ќе го реализирате патувањето. Еве кои би биле најдобрите типови на патување во различните животни фази.
1. Во 20-тите години
Најдобри патувања за овој период од животот се оние кои се полни со адреналин и возбуда. Изберете едно сосема непознато место на мапата, земете ги најосновните работи во еден ранец и патот под нозе. Исто така, можете да заминете на волонтерска работа – да подучувате деца во некоја подалечна земја или да работите со животни во некој егзотичен национален парк. Додека сте млади, можете да заминете каде сакате без посебни подготовки и планови. Можете да најдете неколку пријатели со кои би направиле една рута со автомобил, возејќи се во некои помалку познати предели или во подалечни земји. Доколку сакате да почувствувате вистинска слобода, изберете патување на кое ќе заминете сосема сами. На ваквите патувања се создаваат неверојатни познанства и пријателства, а од друга страна можете да научите и многу за себе.
2. Во 30-тите години
Во овој период од животот веќе сте стигнале до една фаза во која можете да си дозволите мало разгалување. Најдете начин барем на неколку дена да „избегате“ од преголемиот број обврски (на работа, во семејството) и отидете во некој луксузен спа центар. Таму максимално релаксирајте се и наполнете се со енергија. Сте го заслужиле тоа. Испланирајте романтично патување со вашиот партнер. Заминете на некое мирно место каде што ќе можете да уживате во љубовта. Исто така, 30-тите години се можеби најпогоден период во кој можете да организирате духовно патување на кое ќе имате можност да ѕирнете и во најскриените делови од вашите душа и ум. Доколку сте љубител на природата, но не сакате да престојувате во шатори без вода и без струја или пак, во големите кампови каде што мора да ја делите бањата со уште стотици други луѓе, изберете „гламурозно кампување“. Тоа е еден нов глобален тренд, кој нуди удобни услови за сместување во природа. Можете да најдете совршено место, каде во хармонија со природата ќе создадете незаборавни спомени, вредни за паметење.
3. Во 40-тите години
Во овој период од животот направете нешто, за што дотогаш сте мислеле дека не можете да го сторите. Подгответе се за искачување на некој висок врв или впуштете се во некој екстремен спорт. Можете да го испланирате патувањето од вашите сништа, кое дотогаш не сте можеле да си го дозволите, некоја подалечна егзотична дестинација за која секогаш ви недостигале време и финансии. Исто така, во овој период од животот особено се забавни „женските патувања“. Организирајте ги вашите пријателки и заминете на патување исполнето со неверојатна забава и смеа. Дозволете си неколку пијалаци повеќе и танцување до доцна во ноќта.
4. Во 50-тите години
Оваа деценија од животот е како создадена за патувања со историска позадина. Направете листа на места кои отсекогаш ве фасцинирале со својата приказна. Некои дестинации се можеби подалечни, но вреди секој поминат километар. Можете да заминете и на сафари. Сместете се во прекрасните комплекси во Африка, кои нудат неверојатно доживување и блиска средба со дивиот животински свет, кој сте имале можност да го гледате само на телевизиските канали. Доколку имате некое омилено хоби, а веројатно низ петте децении живот сте развиле одредена страст, организирајте си тематско патување во чии рамки има и курс. На пример, доколку уживате во готвењето, заминете на патување во некоја земја каде што ќе можете одблиску да се запознаете со локалната храна, а притоа ќе научите и некои нови вештини при подготвувањето на вкусните јадења. Бидете активен турист, земете велосипед и откријте ја и најтесната уличка во местото каде што сте сместени. Така најмногу ќе дознаете за животот на луѓето.
5. Во 60-тите години
Организирајте еден голем фамилијарен одмор. Изнајмете куќа на море или на планина и соберете ги децата и сите внуци. Детскиот џагор и вревата околу вас, уште еднаш ќе ви потврдат дека зад себе имате шест квалитетно поминати децении. Исто така, во овој период од животот можете да заминете на местата од каде што потекнуваат вашите предци. Посетете го селото или градот каде што се наоѓаат вашите корени или, пак, можеби имате потекло од друга земја, што е уште поголем предизвик. Посетете и еден голем град за кој секогаш сте сонувале. Веројатно сте веќе пензионер и го имате сето време на овој свет. Сместете се во удобен хотел, најдете одличен водич и запознајте го одблиску градот што отсекогаш ве фасцинирал.
6. Во 70-тите
Вие сте одличен турист за крстарење со брод. Големите бродови нудат голема удобност, а без оптоварување ќе можете да посетите десетици прекрасни места. Исто така, удобно патување можете да организирате и со воз. Патувањето со воз можеби не е најбрзо, но глетката е неверојатна. Можете да посетите некое место на кое сте биле одамна и кое ви оставило прекрасни сеќавања. Можете да си направите ретроспекција на својот живот и на сите убави моменти.
