Претходно
5 причини зошто боенките се единственото нешто кое ви треба за да се ослободите од стресот
Секој се соочува со сиви периоди во животот, кога е разочаран или нервозен и кога не може да дочека да ги искаже сите свои жалби и поплаки за сѐ што се случило во текот на денот, неделата, па можеби дури и во месецот. Кога треба да остане уште еден час дополнително на својата досадна, корпоративна работа или да потроши неколку часа на совладување материјал за факултет кој ќе го заборави уште наредниот ден.
Во овие моменти, луѓето често се осврнуваат кон своите најблиски, го бараат нивното друштво и испраќаат брз „СОС сигнал“ од своите телефони за итна средба со цел да си го подигнат расположението. На овој начин, според експертите, луѓето најдобро се справуваат со стресот. Но, постојат и други алтернативни начини на кој може ефективно да ги избегнете стресните ситуации и тие доаѓаат во сосема неконвенционални форми. Последните психолошки и научни истражувања покажуваат дека таков е случајот со боенките. Во продолжение прочитајте ги најдобрите 5 причини зошто боенките се единственото нешто кое ви треба за да се ослободите од стресот.
1. Боењето ви го одвлекува вниманието од онаа ситуација која ја доживувате како стресна
Боенките не ја бараат вашата целосна посветеност и концентрација, но бараат доволно фокусирање за да ви го одвлечат вниманието од актуелните ситуации низ кои моментално поминувате во вашиот живот. Во текот на боењето, целиот ваш фокус е на страницата која ја боите, на боите кои ги користите и на планот како да го завршите вашето дело. Ова не остава време да размислувате за негативните работи кои ви ги окупираат мислите, а вашиот мозок се смирува селектирајќи ги според вас најдобрите нијанси на бои.
2. Боењето боенки всушност претставува еден вид уметност
Можеби звучи неверојатно, но постојат толку многу боенки кои имаат прекрасни дизајни и цртежи кои треба да се обојат, што луѓето често знаат да ги закачат на ѕид. Така добиваат интересна декорација за домот која редовно ќе ги потсетува на нивниот труд, а и позитивно ќе влијае на нивното расположение.
3. Смеење
Групното боење боенки е доста интересна активност, па кога би го повикале вашиот најдобар пријател да бои со вас, не само што ќе уживате во добро друштво, туку и гарантирано ќе се ослободите од сите негативни мисли бидејќи постојано ќе се смеете и шегувате.
4. Сѐ е до едноставноста
Наместо да се дотерувате за во кафулиња и клубови и да завршите мамурни и уште понесреќни од претходно, доколку претходно не сте закажале или испланирале некоја средба или настан, одлучете се за тивка вечер, земете ја боенката и започнете со боење. Ова е една од најдобрите и наједноставните формули за смирена и позитивна средина.
5. Боенките се поевтини од терапијата и траат подолго од виното
Разновидните боенки и квалитетниот материјал за боење се секогаш добар избор за инвестиција, бидејќи траат подолго од виното и ќе ве исполнат исто толку колку што би ве исполнил еден разговор со вашето семејство или пријателите. Кога вашите најблиски се зафатени, земете ја боенката, обојте ги анксиозноста и нервозата кои ви го преплавиле денот и речете му збогум на стресот.
