Претходно
11 причини зошто би требало секојдневно да возите велосипед
Датум: 25 јул 2016
Коментари: 0
Возењето велосипед е активност што ви нуди придобивки од повеќе аспекти. Без разлика дали возите за да ја зголемите вашата физичка активност, да го подобрите вашето здравје, бидејќи се грижите за животната средина или пак за да заштедите пари, избирањето на велосипедизмот е една од најдобрите одлуки којашто сте ја направиле. За да се уверите во тоа, погледнете ги овие 11 причини коишто дополнително ќе ве мотивираат да посегнете по вашиот велосипед.
1. Ги активирате мускулите
Додека возите велосипед се активираат речиси сите мускули во телото. Дури и само за една недела неактивност, силата на вашите мускули може да падне до 50%, што предизвикува штета на подолг рок. Раздвижете ги мускулите на нозете, грбот, стомакот, рацете или рамената со возење велосипед. Ова ќе го затегне вашиот мускулен систем и ќе ви овозможи да функционирате поефикасно.
2. Ја заштитувате животната средина
Во споредба со автомобилот, велосипедот зафаќа помал простор и не ја загадува околината. Исто така тој ви овозможува да патувате три пати побргу отколку со одење, а единственото гориво коешто ви е потребно е храната којашто ја внесувате.
3. Ја намалувате болката во грбот и ‘рбетот
Да имате добра положба на телото додека возите велосипед е многу важно, затоа што специфичните движења на нозете ги стимулираат мускулите во долниот дел на грбот, каде што многу луѓе искусуваат болка. Движењата коишто ги правите при возењето велосипед го зајакнуваат вашиот ‘рбет и ви помагаат да се справите со стресот. Тука се активирани и помалите ‘рбетни мускули коишто го намалуваат ризикот за појавување на болки во грбот и други проблеми.
4. Ги заштитувате зглобовите
Уште една придобивка којашто ви ја нуди велосипедизмот е заштитата на зглобовите. Со кружните движења коишто ги правите при возењето велосипед вие ја намалувате веројатноста за добивање артроза, една од најчестите болести на зглобовите.
5. Го подобрувате балансот
Велосипедизмот е идеален начин на којшто можете да си обезбедите активност и релаксација, што прави да постигнете соодветна рамнотежа на вашето тело. Возењето велосипед го балансира менталниот и емоционалниот напор и ја задоволува потребата за физичка активност кај оние коишто не практикуваат редовно вежбање.
6. Го намалувате стресот
Едноличните и кружни движења ви помагаат за ублажување на анксиозноста, депресијата и другите психолошки проблеми. Всушност, со ова ќе ги стабилизирате емоционалните и физичките функции во телото. Уште една придобивка којашто ви ја нуди велосипедизмот е тоа што ви помага да ја контролирате хормоналната нерамнотежа.
7. Го подобрувате здравјето на срцето
Недостатокот на активност му штети на вашето срце, а велосипедизмот е совршен за да го тренирате овој орган и да го ослободите од стрес. Редовното возење велосипед значително го намалува ризикот од срцеви заболувања.
8. Ја зголемувате циркулацијата
Нарушеното дишење е последица од недоволното вежбање коешто доведува до недоволна циркулација. Со вежбите коишто ќе ги практикувате преку возењето велосипед ќе ги прочистите белите дробови со тоа што ќе имате поголема размена на кислород, ќе се зголеми протокот на крв, па ќе ви се зголеми и енергијата.
9. Го подобрувате крвниот притисок
Кога возите умерено, можете да го намалите или да го спречите високиот крвен притисок. На овој начин ќе го избегнете оштетувањето на органите во вашето тело.
10. Ги намалувате телесните масти и холестеролот
Возењето велосипед ќе ги потроши вашите резерви на масти и ќе ја смени рамнотежата на вашиот холестерол, односно, ќе го фаворизира добриот наспроти лошиот холестерол којшто е закана за вашето здравје. Редовното возење велосипед успешно ви помага и да се справите со вишокот килограми.
11. Ја зголемувате издржливоста
Аеробик вежбите, како што е велосипедизмот, ви овозможуваат доволно вежбање без да го изложувате вашето тело на екстремен напор. Со зголемување на издржливоста помалку ќе страдате од замор, а ќе го зголемите и чувството на благосостојба.
