Претходно
Колку е лесно да се клонира вашето лице?
Датум: 11 мај 2013
Коментари: 0
Американската артистка Хедер Дуи Хагборг ја приближила уметноста многу блиску до науката, со нејзиниот експериментален проект „Stranger Visions“, во кој пресоздава човечки лица од ДНК што ја наоѓа на предмети фрлени на улиците, како што се плукната гума за џвакање, паднати влакна или отпушок од цигара.
Работејќи заедно со биолошката лабораторија „Genspace“, артистката имала можност по пат на анализа на ДНК да ги открие физичкиот изглед, полот, бојата на очите, културолошките корени на луѓето. Со истражувањето спроведено во овој проект не можело да се одреди возраста на личноста од која е најдена ДНК, па артистката решила да ги конструира нејзините маски како да се лица на 25-годишни луѓе.
И покрај тоа што Хедер признава дека нејзините 3Д портрети можеби не изгледаат идентично како луѓето чијашто ДНК ја користи, таа тврди дека маските дефинитивно би личеле барем на роднина на личноста.
Уметничката серија презентира еден, иако застрашувачки, сепак и фасцинантен факт за тоа колку може да се открие за еден човек од неговата ДНК и колку е лесно да се дојде до неа. Секојдневно, во јавност сите ние оставаме бесконечно количество на скапоцена информација. Зарем не ве застрашува помислата дека еден ден може да влезете во некоја уметничка галерија и да го видите внатре сопственото лице?
Во јуни, артистката ќе зборува за нејзиниот проект и ќе презентира дел од проектот, во Лонг Ајленд, Њујорк.
Хедер со својот генетички добиен портрет од себеси
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
