Претходно
7 врвни филмски наслови на репертоарот на А1 Drive-in киното
Со најавата за отворање на A1 Drive-in киното на 29 септември со повеќекратниот оскаровец „Паразит“ (Parasite, 2019), A1 Македонија го објави и целосниот репертоар на настанот.
7 филмски ноќи, 7 филмски доживувања од повеќе жанрови и говорни подрачја, A1 Drive-in киното ќе понуди внимателна селекција од некои од најпопуларните филмски остварувањата од последниве две години.
Така, втората вечер, односно на 30 септември, ќе имате можност да ја погледнете прекрасната семејна драма „Вистина“ (The Truth или во оригинален наслов La vérité од 2019 г.) која е од англиско-француско говорно подрачје, со Кетрин Денев, Жулиет Бинош и Итан Хоук во главните улоги.
На 1 октомври на репертоарот е данскиот филм „Уште една тура“ (Another Round или Druk, 2020), со Мадс Микелсен во главната улога, инаку доста популарен по своето остварување во серијалот „Ханибал“, кој во „Уште една тура“ во улогата на Мартин, заедно со своето пријатели, ја тестира теоријата дали нивните животи ќе се подобрат доколку константно одржуваат одредено ниво на алкохол во крвта.
Во петок вечер, пак, на 2 октомври, ќе можете да уживате во маестралната адаптација на класичната приказна за добропознатиот „Пинокио“ (Pinocchio, 2019), со неповторливиот оскаровец Роберто Бенини во улога на Џепето.
Викендот на A1 Drive-in Cinema е резервиран за два одлични француски филма. Возбудливиот историски трилер „Офицер и шпион“ (An Officer and a Spy или J’accuse во оригинал, 2019), кој е најновото филмско остварување на режисерот Роман Полански, ќе можете да го погледнете на 3 октомври, а пак наредниот ден, на 4 октомври, на репертоарот е акционата драма „Проксима“ (Proxima, 2019) од англиско-француско говорно подрачје. Тој ја следи приказната на една астронаутка (во улога на Ева Грин), која се подготвува за едногодишна мисија на Меѓународната вселенска станица.
Затворањето на овој седумдневен филмски фестивал е на 5 октомври со проекција на популарниот документарец за фронтменот на поранешната група „Оејзис“ (Oasis), „Лиам Галагер: Како што беше“ (Liam Gallagher: As It Was, 2019).
Резервацијата на влезниците е бесплатна и може да се направи на овој линк преку платформата на www.karti.com.mk, но најдоцна до 12 часот на денот на проекцијата и потребно е при влегувањето таа да се покаже на мобилниот телефон или во отпечатена форма. Влезот за сите денови е од 19:30 до 20:30 часот, а, пак, проекциите започнуваат во 21 часот.
За повеќе информации околу деталите за резервации, протоколите и мерките за превенција од КОВИД-19 за времетраењето на А1 Drive-in киното информирајте се на официјалниот настан на Фејсбук страницата на А1 Македонија.
