Претходно
Книга: „Сенки од еднорог“ – Ракел Мартинес
Датум: 08 окт 2014
Книга која ве повикува да се доближите до себеси и да се вивнете без да ги одвоите нозете од земјата
Наша оценка: 9/10
Ваша оценка: 
(2 гласа, просек: 10,00 од 10)
Loading...
„Сенки од еднорог“ е дело на шпанската авторка Ракел Мартинес, со кое во 2010-та година ја добива Европската награда за литература. И тоа е сосема оправдано земајќи го предвид фактот дека станува збор за едно навистина необично, оригинално дело, каде како сенки се испреплетуваат минатото и сегашноста, за на крајот сосема случајно се создаде пат за ново самооткривање и подобар пат кон иднината. Преку ликовите на младите Клаудија и Едгар, на многу поетски, современ, напати кондензиран јазик, Ракел Мартинес зборува за животот на имигрантите во Мадрид, за бегството, потрагата по себе и сопствениот идентитет.
Доделуваме 2 книги во соработка со Издавачкиот центар ТРИ
Имено, Клаудија е новинарка родена во Овиедо, но израсната во Аргентина. Се враќа во Шпанија со надеж дека ќе започне нов живот, и првата работа што ја наоѓа е во еден мадридски коктел-бар, „Еднорог“, кој зрачи со мистерија и уникатност. Таму го запознава Едгар, кој исто така бега од своето тешко минато. Преку внатрешните монолози и размислувања, се објаснуваат причините за нивното доаѓање во Мадрид.
Инаку книгата се состои од два дела. Првиот дел целосно е посветен на Клаудија, додека вториот, во поголем дел ги покрива случувањата на Едгар. При раскажувањето на Клаудија, читателот постојано е на релацијата Аргентина-Шпанија, што иако на почетокот изгледа малку чудно и несфатливо, сепак додава на чувството на нејасност и мистериозност, што самата книга сака да го постигне. Подоцна, во вториот дел, приказната на Клаудија се испреплетува со онаа на Едгар, создавајќи цела мрежа на случувања и сенки, како би се изградиле темелите на нова сегашност, а со тоа полека би почнало да се наѕира себепронаоѓањето и она што допрва треба да се случи.
Како и еднорогот, кој живее во нашата имагинација и желби, така и главните ликови, минуваат низ истата дуалност, и живеат меѓу она што се и она што сакаат да постанат. Низ своите желби и имагинации се трудат да го пронајдат својот пат, барајќи го еднорогот, лутајќи, преиспитувајќи се себе, своите одлуки и своето минато. На една средба со еднорогот, добиваат шанса да се пронајдат себеси, шанса што е подеднакво прекрасна и неочекувана.
Еднорогот како митолошко суштество, постои во грчката митологија, кинеската традиција и индиската уметност. Во литературата најчесто симболизира чистота, невиност, мистериозност, копнеж за мир и вистина, по која сите трагаат и сакаат да ја достигнат. Со еден збор – самоспознавање и нов почеток. Токму она по кое чудните, осамени и различни Кладуија и Едгар постојано трагаат.
Долгоочекуваната средба со еднорогот е шанса да се пронајдат себеси. По сите перипетии, доживеани разочарувања, болка и самосвест, при средбата со еднорогот се помируваат со реалноста и своето минато, подготвени за еден поубав живот и постоење. Набргу двајцата сфаќаат дека колку и да се обидуваш, невозможно е да започнеш сè од почеток. Но можеш да се откриеш и прифатиш себеси. Да се доближиш до своето јас и да се вивнеш без да ги одвоиш нозете од земјата.
Книжарница ТРИ, ГТЦ, I кат
тел: 02/3238-722
knizarnica@kniga.com.mk
За да учествувате во наградната игра треба да оставите коментар, да го твитнете постот или да го пинувате на Пинтерест, користејќи го хаштагот #СакамКнигаОдТРИ и вашето име и презиме (ако не може да се прочита точно од вашиот профил). Имате време до среда, 15 октомври 2014.
Добитниците ќе бидат известени преку профилите на Кафе пауза на Фејсбук, Твитер и на Пинтерест.
Наградите ќе можете да си ги подигнете со документ за лична идентификација во книжарницата ТРИ.
#СакамКнигаОдТРИ
#СакамКнигаОдТРИ