Книга: „Јас те сакам повеќе“ – Лиса Гарднер

„Јас си ја сакам ќерката“ – дали овие зборови се доволни за да ве убедат дека таа е добра мајка?

Наслов на оригиналот: Love you more – Lisa Gardner

Нејзината прва новела ја има објавено на 20 години, а ако се земе предвид дека работела на книгата 3 години и ја препишала од почеток 4 пати, може да се каже дека Лиса Гарднер била навистина упорен и неуморен тинејџер со јасна цел. Има објавено 27 новели, а наскоро ќе излезе и нејзиното последно дело „Watch & Go“,кое што како и сите претходни, читателите во преку 30 земји во светот го очекуваат со нетрпение.

За својата работа вели дека е напорна и бара многу истражувања, особено затоа што станува збор за крими новели со неверојатни заплети. Не сака да ги базира своите ликови врз реални личности бидејќи не би сакала да се соочи со некакви тужби, но затоа доста често добива инспирација за заплетите од вистински крими настани.

За тоа од каде ги добива идеите за бројните новели, освен секако од хоророт во вестите, вели дека ни сама не е сигурна, но среќна е што успева страшните сценарија кои ѝ паѓаат на памет да ги канализира во пишување книги. Наводно, да бидеш сериски убиец не било толку исплатливо како писател! Сигурни сме дека сите нејзини читатели, а и оние кои не слушнале за неа, се многу среќни поради нејзината одлука.

Синопсис

Случајот е јасен – Теса Леони, државен полицаец и единствена жена во нејзината касарна во Алстон Брајтон, мајка на шестогодишно девојче Софи и сопруга на насилен маж, кој го убива со своето службено оружје откако со години е жртва на домашно насилство. За детективите ДиДи Ворен и Боби Доџ ова е прилично едноставен и за жал чест случај кој би требало брзо да се разреши, но постојат два проблеми: ќерката е исчезната, а Теса е еден од најинтелигентните и најцврсти полицајци кои ја завршиле Академијата.

Зошто тогаш, паметна и цврста жена не би ја искористила приликата да побегне од својот маж за време на неговите патувања кои траеле со недели? Зошто при нападот веднаш го употребила својот пиштол наместо арсеналот од други оружја со кои како трениран полицаец веднаш би можела да го онеспособи наместо да го убие? Зошто не се обратила за помош кај нејзините колеги? И најважно од сè, каде е нејзината ќерка?

Неверојатен е правецот во кој се движат настаните во оваа фантастична новела, неизвесноста го следи читателот до крај, а сето она што го добивате како информација на почеток ве води во целосно погрешна насока. Но, читателите не се сами во борбата со мистериозниот случај, двајцата детективи се впуштаат во приказната која започнува со ранлива жена со модро око и потрес на мозок, а завршува со најхрабриот лик кој може да се појави во која било книга – мајка. А одговорот лежи во едно единствено прашање „Кого сакаш?“

Лична критика

Ова е втората книга којашто ја читам во овие неколку месеци, а вклучува жена-детектив како еден од главните ликови и изгубено девојче, и исто како и првата – „Ангелски повик“, буквално ме остави без здив и без спиење. Веќе еднаш споменав дека сакам приказни за жени-херои и можеби затоа толку и ми се допадна, но реално, со фантастичен лик како Теса Леони може да се поврзе секој, особено ако е родител. Она што најмногу ми остави впечаток е тоа што писателката успешно ја одржува неизвесноста докрај и ова е една од ретките книги во кои навистина не можеш веднаш да одлучиш кој е позитивецот, а кој е негативецот.

Без премногу развлекувања и непотребни описи, Лиса Гарднер ќе ве води од една неверојатна сцена во друга, длабоко навлегувајќи во суштинското прашање – „Колку далеку може да оди една мајка за своето дете?“ Ова е книга за пожртвуваност, пријателство, храброст, но пред сè љубов, и тоа безгранична. Добро изградените ликови и слоевитоста на приказната која навлегува во оние темни ќошиња на човечката психа, ја прават оваа книга еден од подобрите трилери кои ги имам прочитано.

💗 Денес ви споделуваме рец

💗 Денес ви споделуваме рец

💗 Погледнете ги овие невер

📢 Денес ви споделуваме рец

Следете нѐ на Инстаграм