Претходно
Неколку причини зошто да гледате „Glee“
Датум: 02 дек 2010
Коментари: 0
“Гли„ (Glee) е музичка ТВ серија која на малите екрани своето официјалното деби го имаше на 19 мај 2009 година. Таа е во продукција на „20th Century Fox Television“, а нејзината популарност ја докажува фактот дека првата сезона била гледана од над 10 милиони гледачи само во САД.
Главни улоги: Лиа Мишел, Диана Агрон, Крис Колфер, Кори Монтих, Метју Морисон, Џејн Линч….
Жанр: комедија, мјузикл, драма
Времетраење: 42 – 48 минути
Наша оценка: 7/10
.
Тинејџерската серија е приказна за вистинските вредности во животот, амбициите и желбите, подемите и падовите. Сатиричната приказна проследена со песна, ја издвојува оваа серија од класичните мјузикли, а пофалбите пристигнуваат токму на адреса на изборот на песните. Покрај стари незаборавни класици, во серијата се пеат песни кои моментално се актуелни и вртени по ТВ и радио станиците. Низ епизодите ќе наидете на песни од Мадона, Бијонсе, Кети Пери, Лејди Гага, Аврил Лавињ, Кели Кларксон, Џастин, Ашер, Јуту, Бон Џови и многу други славни и прочуени имиња на музичката сцена.
.
Одлично испеаните песни проследени со уште поинтересна кореографија, ќе ви покажат како да ги испеете вашите емоции, дури и ако не сте музички талентирани. Ако сè уште не сте почнале да ја гледате оваа серија, а сте решени да го сторите тоа, никако не се откажувајте после првата епизода, која ќе ви создаде чувство како да гледате уште еден тинејџерски мјузикл. Напротив, ова е серија која ве советува дека не треба да се откажувате од вашите соништа, затоа што никогаш не е премногу доцна за да го живеете вашиот животен сон. Таа ќе внесе оптимизам во вашите мисли и надежи и навистина ќе си поигрува со вашите емоции.
Кратка содржина: Приказната се одвива во едно средно училиште во Охајо, каде што учителот по шпански јазик, го презема клубот „Гли“. Неговата цел е да ја врати старата слава на клубот, па така и покрај критиките и незгодите кои ќе му се случуваат, тој успева да ја подобри програмата и да натера дел од учениците да се приклучат, меѓу кои се и некои од познатите фудбалери и мажуретки во училиштето..
