Претходно
Филм: Нонстоп (Non-Stop)
На 12.000 метри височина никој не е безбеден…
Режија: Жаума Колет-Сера
Улоги: Лиам Нисон, Џулиен Мур, Мишел Докери
Времетраење: 106 минути
Јазик: англиски
Премиера: 28 февруари 2014
Жанр: акција, мистерија, трилер
Наша оценка: 9/10
Ваша оценка: 
(23 гласа, просек: 8,78 од 10)
Loading...
Можеби би помислиле дека филм во кој целото дејствие се случува во само еден авион може да биде малку монотон и досаден. Но, Нонстоп е нешто сосема спротивно. Станува збор за 106 минути исполнети со многу акција, мистерија и динамика кои ќе ви го држат вниманието во текот на целиот филм. И најинтересно од сѐ е што нема да знаете што точно се случува до самиот крај. Токму таа неизвесност е она што го прави овој филм одличен.
Бил Маркс (Лиам Нисон) е воздухопловен маршал кој мрази летање. На прв поглед неговиот живот изгледа како да се распаѓа. Тој е разведен, има проблеми со алкохолот и делува како депресијата да му ја земала контролата од неговите раце. Но, како и секогаш работите не се баш онака како што изгледаат.
Летот изгледа како и секој друг, сѐ додека Бил не добие необична порака на мобилниот. „Дали си подготвен за својата должност маршале?“ На прашањето кој е таму, маршалот добива уште една порака која вели „Еден од твоите патници“. По краток разговор соговорникот му вели да намести аларм за 20 минути, бидејќи доколку за тоа време не му бидат префрлени 150 милиони долари на неговата сметка, тој ќе убие еден патник. И потоа за 20 минути истото ќе се случи повторно. И тоа ќе се повторува сѐ додека не ги добие парите.
За да биде уште поинтересно, работите многу брзо ќе тргнат наопаку и поради својата репутација, главниот осомничен ќе стане Бил, токму оној кој е пратен да го заштитува летот. Дали тој навистина е виновен за целата оваа ситуација? Или пак, станува збор за нешто сосема друго? Дали некој од патниците си игра со умот на маршалот и се обидува да го намести или пак, работите ги води некој кој воопшто не се ни наоѓа во авионот? Овие неколку прашања постојано ќе ви се вртат во глава и верувајте текот по кој се движи приказната е толку непредвидлив што истовремено ќе се сомневате и во сите и во никого. А на крајот, ќе се случи токму она за кое што ниту еднаш нема да помислите дека би можело да се случи.
Нонстоп е филм кој навистина вреди да се погледне. Доколку сте љубители на филмовите кои ве држат постојано на работ од столот и кои изобилуваат со мистериозни и неочекувани пресврти, тогаш со сигурност ќе го обожавате овој филм. Лиам Нисон како и секогаш одлично ја изигрува својата улога и со својот перформанс ќе направи да се почувствувате како и вие да сте патник во овој лет.
Бидете секогаш во тек со новите содржини на Кафе пауза. Следете нè на Твитер или пак станете фанови на нашата страница на Фејсбук.
