Филм: Игри на гладните (The Hunger Games)

Филм за жестоката борба за гол опстанок и рамнодушноста на околината кон тоа

Режија: Гери Рос

Улоги: Џенифер Лоренс, Џош Хачерсон, Лијам Хемсворт, Вес Бентли, Вуди Харелсон, Лени Кравиц

Времетраење: 142 минути

Јазик: англиски

Премиера: 23 март 2012

Жанр: акција, авантура, научна фантастика

Наша оценка: 10/10

Ваша оценка: (60 гласа, просек: 9,00 од 10)
Loading...

Игри на гладните (The Hunger Games) е еден од оние епски филмови кои дигаат многу прашина меѓу публиката, имаат повеќе продолженија и едноставно не смеат да се пропуштат. Приказната, базирана на истоимените дела на Сузан Колинс, претставува спој на гладијаторските борби и реалните шоуа од типот на „Преживеан“, каде што суровоста и бескомпромисната борба за гол опстанок се единствениот пат до успехот.

Дејството е сместено во пост-апокалиптична иднина во Капитол, главниот град на државата Панем. Како казна за некои минати бунтови, а и заради забава на гледачите, дванаесетте области околу главниот град мораат секоја година да испратат по едно момче и една девојка на возраст од 12 до 18 години, за да учествува во „Игрите на гладните“. Тоа е натпревар кој се одржува еднаш годишно, во кој учесниците се борат до смрт секој против секого, а тоа во живо се пренесува на телевизија, за да се забавуваат граѓаните на Капитол.

Кога од дванаесеттата област ќе биде избрана малата Примроуз Евердин (Вилоу Шилдс), на нејзиното место доброволно ќе се пријави нејзината постара сестра Кетнис (Џенифер Лоренс). Таа ќе мора да го напушти своето семејство и пријателот Гејл (Лијам Хемсворт) заминувајќи полна со надеж дека ќе се врати жива и здрава.

Од нејзината област е избран и нејзиниот врсник Пита (Џош Хачерсон), а во нивно друштво ќе се најде и алкохоличарот Хејмич, еден од минатите победници на шоуто кој ќе им биде назначен за ментор. Кетнис и Пита ќе привлечат големо внимание кога на интервјуто во шоуто за претставување на учесниците во борбата, Пита ќе признае дека одамна е вљубен во Кетнис. Таа ќе биде гневна на него мислејќи дека тоа го кажал за да привлече спонзори кои можат да го снабдат со храна и оружје. Сепак, тој ќе нема многу време да ѝ објаснува затоа што наближува суровата битка во која секој мора да го убие секого во борбата за гол опстанок. А тогаш, двајцата ќе мора да ги употребат сите свои квалитети каде што немаат избор, освен да се истребат еден со друг, пред воопшто љубовта да дојде на дневен ред.

„Игри на гладните“ може да ве потсети на некои други епски приказни, како на пример „Господарот на прстените“, поради паралелниот универзум во кој се случува дејството, големата тензија и силниот карактер и борбеноста на ликовите. Но, за разлика од нив, овој филм одлично ја доловува природата на реалните шоуа, кои својата популарност ја билдаат благодарение на нечувствителноста со која гледачите ги следат суровите случувања на екранот.

Покрај приказната, одличен впечаток остава и глумата на Џенифер Лоренс. По извонредните перформанси во Зимска коска (Winter’s Bone) и Лудо вљубени (Like Crazy) веќе би било клише да смислуваме нови суперлативи за нејзините актерски можности. Покрај нејзината, мора посебно да се истакне и глумата на Вуди Харелсон, кој го игра менторот Хејмич Абернати.

Игри на гладните во никој случај не смеете да го пропуштите. Нека не ве плашат оние 142 минути времетраење, нема да почувствувате кога поминале, а потоа со нетрпение ќе го очекувате и наредното продолжение.

💗 Денес ви споделуваме рец

💗 Денес ви споделуваме рец

💗 Погледнете ги овие невер

📢 Денес ви споделуваме рец

Следете нѐ на Инстаграм